క్రికెట్ ప్రపంచంలో రికార్డులు సృష్టించే ఆటగాళ్లు చాలా మంది ఉంటారు. కానీ, అభిమానుల గుండెల్లో ఎప్పటికీ ఉండిపోయే జెంటిల్మెన్ లు కొందరే ఉంటారు. అలాంటి అరుదైన క్రికెటర్ల జాబితాలో న్యూజిలాండ్ మాజీ కెప్టెన్ కేన్ విలియమ్స్ పేరు ఖచ్చితంగా ఉంటుంది. తాజాగా ఆయన అంతర్జాతీయ క్రికెట్కు రిటైర్మెంట్ ప్రకటించడంతో ఒక అద్భుతమైన అధ్యాయం ముగిసింది. 16 ఏళ్ల సుదీర్ఘ కెరీర్లో ఎన్నో పరుగుల మైలురాళ్లను అందుకున్న కేన్ మామ, కేవలం రికార్డుల వల్ల మాత్రమే కాదు.. మైదానంలో అతను చూపించే సంస్కారం, ఓటమిని స్వీకరించే విధానం వల్లే కోట్లాది మందికి ‘ఫేవరెట్’ అయ్యాడు. సోషల్ మీడియాలో ప్రస్తుతం కేన్ విలియమ్స్ రిటైర్మెంట్పై నెటిజన్లు ఎమోషనల్ అవుతున్నారు. ముఖ్యంగా గతంలో జరిగిన ఐసీసీ వరల్డ్ కప్ ఫైనల్స్, అలాగే ఎన్నో కీలక మ్యాచ్ల్లో న్యూజిలాండ్ జట్టు గెలుపు అంచుల్లోకి వచ్చి ఓడిపోయిన సందర్భాలను గుర్తు చేసుకుంటున్నారు.
ప్రతి మ్యాచ్ ఓడినప్పుడూ కేన్ విలియమ్స్ ముఖంలో ఒకే రకమైన చిరునవ్వు కనిపిస్తుంది. ప్రపంచంలో ఎంతటి వారైనా ఓటమిని తట్టుకోలేక కన్నీళ్లు పెట్టుకుంటారు, లేదా ఆవేశాన్ని ప్రదర్శిస్తారు. కానీ, విలియమ్స్ మాత్రం పెదవులపై చిరునవ్వుతో ప్రత్యర్థి జట్టును అభినందిస్తాడు. క్రికెట్ చరిత్రలోనే అత్యంత ఉత్కంఠభరితమైన, వివాదాస్పదమైన 2019 వన్డే వరల్డ్ కప్ ఫైనల్ ఎవరూ మరువలేరు. బౌండరీల కౌంట్ నియమం వల్ల కివీస్ జట్టు చేతిలో ఉన్న కప్పు చేజారిపోయింది. ఆ సమయంలో ఏ ఆటగాడైనా కుప్పకూలిపోయేవాడు. కానీ, అప్పుడు కూడా కేన్ విలియమ్స్ పెదవుల పైనుంచి ఆ చిరునవ్వు చెదరలేదు.
ఆ క్షణంలోనే అతను ప్రపంచవ్యాప్తంగా కోట్ల మంది గుండెలను గెలుచుకున్నాడు. విలియమ్స్ ఆటలోనే కాదు, ప్రవర్తనలోనూ ‘క్రికెట్ అనేది జెంటిల్మెన్ గేమ్’ అని నిరూపించాడు. ఇక, న్యూజిలాండ్ను రెండుసార్లు వరల్డ్ కప్ ఫైనల్స్కు చేర్చడమే కాకుండా, 2021లో భారత్పై గెలిచి తొలి ఐసీసీ వరల్డ్ టెస్ట్ ఛాంపియన్షిప్ ట్రోఫీని అందించాడు. దాదాపు 19,000 పైగా అంతర్జాతీయ పరుగులు, 48 సెంచరీలతో కివీస్ చరిత్రలోనే అత్యుత్తమ బ్యాటర్గా నిలిచాడు. స్లెడ్జింగ్కు ఎప్పుడూ దూరంగా ఉండే. కేన్ విలియమ్స్ మైదానాన్నివీడినా అతను నేర్పిన క్రీడా స్ఫూర్తి, ఓటమిని హుందాగా స్వీకరించే తత్వం తరతరాల క్రికెటర్లకు రోల్ మోడల్గా నిలుస్తుంది.
