ఐపీఎల్ 2026 ప్రారంభానికి ముందే కోల్కతా నైట్రైడర్స్కి పెద్ద తలనొప్పి వచ్చి పడింది. టీమ్ సెలెక్షన్స్తో కోచ్లు అయోమయంలో పడ్డారు. ముఖ్యంగా రూ.25.20 కోట్ల భారీ మొత్తానికి కొనుగోలు చేసిన కామెరూన్ గ్రీన్కు సరైన స్థానాన్ని నిర్ణయించడం జట్టు మేనేజ్మెంట్కు పెద్ద సవాల్గా మారింది. జట్టు అసిస్టెంట్ కోచ్ షేన్ వాట్సన్ ప్రెస్ మీట్లో మాట్లాడుతూ తమ జట్టులో ప్రపంచ స్థాయి బ్యాటర్లు చాలా మంది ఉన్నారనీ,. అందుకే ఎవరు ఎక్కడ ఆడాలి అన్నది నిర్ణయించడం పెద్ద టాస్క్ గా చెప్పుకొచ్చాడు. ఇది మంచి సమస్యే అయినా, సరైన కాంబినేషన్ ఫిక్స్ చేయడం కీలకమన్నాడుకేకేఆర్ స్క్వాడ్లో ఓపెనర్ల కొరత లేదు.
ఫిన్ అలెన్, టిమ్ సైఫర్ట్ స్పెషలిస్ట్ ఓపెనర్లు కాగా అజింక్య రహానే, సునీల్ నరైన్కు కూడా టీ20ల్లో ఓపెనింగ్ చేసిన అనుభవం ఉంది. ఇదే సమయంలో గ్రీన్ కూడా టాప్ ఆర్డర్లోనే ఆడటానికి ఇష్టపడతాడు. ఈ పరిస్థితుల్లో గ్రీన్ను ఎక్కడ ఆడించాలని అనేది క్లారిటీ లేకుండా పోయింది.గ్రీన్ ఒక అద్భుతమైన ఆల్రౌండర్ అనీ ,అతనికి అవకాశం ఎక్కడ వచ్చినా దాన్ని పూర్తిగా వినియోగించుకుంటాడని వాట్సన్ నమ్మకం వ్యక్తం చేశాడు.బ్యాటింగ్ లైనప్లో రచిన్ రవీంద్ర, రింకూ సింగ్, అంగ్క్రిష్ రఘువంశీ, రమణ్ దీప్ సింగ్ వంటి ఆటగాళ్లు కూడా ఉండటంతో పోటీ మరింత పెరిగింది. అనుభవం, యువత కలయికతో బలంగా ఉన్నా, సరైన బ్యాలెన్స్ సాధించడం కేకేఆర్కి కీలకంగా మారింది.
మార్చి 29న ముంబై ఇండియన్స్తో వాంఖడే స్టేడియంలో కేకేఆర్ తమ తొలి మ్యాచ్ ఆడనుంది. ఆ తర్వాత ఈడెన్ గార్డెన్స్లో వరుసగా మ్యాచ్లు ఆడనుంది. ఇదిలా ఉంటే గత సీజన్లో ఈడెన్ గార్డెన్స్ పిచ్ కేకేఆర్కు పెద్ద సమస్యగా మారింది. విదేశీ ఆటగాళ్లపై ఎక్కువగా ఆధారపడిన బ్యాటింగ్ లైనప్ కారణంగా జట్టు ఇబ్బందులు ఎదుర్కొంది. ఈసారి పిచ్ ప్రిపరేషన్లో జాగ్రత్తగా వ్యవహరించాల్సిన అవసరం ఉంది. మొత్తానికి, స్టార్ ప్లేయర్లతో నిండిన కేకేఆర్ జట్టుకు ఇప్పుడు అసలు ఛాలెంజ్ ఒకటే సరైన కాంబినేషన్తో మ్యాచ్లో అడుగుపెట్టడం. గ్రీన్ వంటి స్టార్కు సరైన స్థానం ఇవ్వగలిగితేనే జట్టుకు విజయాలు అందడం ఖాయమనే చెప్పొచ్చు.
