సంజూ ఏంటా ఫుట్ వర్క్ ? గవాస్కర్ ఫైర్…!

న్యూజిలాండ్‌తో జరుగుతున్న టీ20 సిరీస్‌లో సంజూ శాంసన్‌కు ఫామ్ సమస్యలు ఇంకా కొనసాగుతున్నాయి. మరోసారి మంచి స్టార్ట్ ఇచ్చినట్టే కనిపించి, పెద్ద స్కోర్‌గా మార్చుకోలేకపోయాడు. నాలుగో టీ20 మ్యాచ్‌లో 15 బంతుల్లో 24 పరుగులు చేసి ఔటవడంతో సంజూ స్థానం చుట్టూ ఒత్తిడి మరింత పెరిగింది.భారీ లక్ష్యాన్ని ఛేదించే క్రమంలో ఆరంభంలోనే అభిషేక్ శర్మ, కెప్టెన్ సూర్యకుమార్ యాదవ్ వికెట్లు కోల్పోయింది. ఆ సమయంలో క్రీజులో ఉన్న సంజూ శాంసన్ ఇన్నింగ్స్‌ను కాస్త నిలబెట్టే ప్రయత్నం చేశాడు. మూడు ఫోర్లు, ఒక సిక్స్‌తో ఆకున్నే షాట్లు ఆడుతూ సెటిల్ అవుతున్నట్టు అనిపించాడు.అయితే, న్యూజిలాండ్ కెప్టెన్ మిచెల్ సాంట్నర్ వేసిన ఒక బంతికి క్లీన్ బౌల్డ్ అయ్యాడు. క్రీజులో నిల్చొని ఆడిన సంజూ, బంతిని మిస్ చేయడంతో నేరుగా స్టంప్స్ తగిలాయి.

ఈ ఔటే మ్యాచ్‌లో టర్నింగ్ పాయింట్‌గా మారింది. కామెంటరీలో ఉన్న భారత మాజీ కెప్టెన్ సునీల్ గవాస్కర్ ఈ వికెట్‌పై తీవ్రంగా స్పందించారు. సంజూ బ్యాటింగ్‌లో ఉన్న స్పష్టమైన లోపాన్ని ఆయన బహిర్గతం చేశారు.సంజూ ఔటైన క్షణాన్ని విశ్లేషించిన గవాస్కర్ స్పిన్‌కు ఎదురుగా కనీస ఫుట్‌వర్క్ కూడా కనిపించలేదని చెప్పారు. కాళ్లు కదలకుండా ఒకే చోట నిలబడి ఆడటం వల్లే స్టంప్స్ పూర్తిగా ఎక్స్‌పోజ్ అయ్యాయని ఆయన అభిప్రాయపడ్డారు. రీప్లే చూసిన తర్వాత కూడా గవాస్కర్ అదే విషయాన్ని మరింత బలంగా చెప్పారు. లెగ్ స్టంప్ బయటికి వెళ్లి షాట్ ఆడే ప్రయత్నంలో సంజూ మూడూ స్టంప్స్‌ను తెరిచి పెట్టేశాడని, అలా మిస్ అయితే బౌలర్ తప్పకుండా వికెట్లు తీసుకుంటాడని అన్నారు. అదే సంజూ విషయంలో మరోసారి జరిగిందని స్పష్టం చేశారు.

ఇషాన్ కిషన్ నంబర్ 3లో మంచి ఇన్నింగ్స్ లు ఆడుతుండడంతో సంజూ శాంసన్‌కు వచ్చే అవకాశాలపై ఇప్పుడు పెద్ద చర్చ మొదలైంది. వరల్డ్ కప్ సమీపిస్తుండటంతో టీమ్ మేనేజ్‌మెంట్ తీసుకునే నిర్ణయం ఆసక్తిగా మారింది. మరోవైపు సంజూని ఒత్తిడిలోకి నెట్టొద్దని కొందరు మాజీలు సలహాలు ఇస్తున్నారు. కెప్టెన్ సూర్యకుమార్ యాదవ్ మాదిరిగానే సంజూ కూడా ఫామ్‌లోకి వస్తాడంటూ కైఫ్ అభిప్రాయపడ్డాడు. ఫిబ్రవరి 7 నుంచి టీ20 వరల్డ్‌కప్ ప్రారంభం కానున్న నేపథ్యంలో టీమ్ మేనేజ్‌మెంట్ ఎలాంటి నిర్ణయాలు తీసుకుంటుందో వేచి చూడాలి.