బంగారం కొనాలని ప్లాన్ చేస్తున్నారా? లేదా పసిడిపై ఇన్వెస్ట్ చేయడానికి సరైన టైమ్ కోసం వెయిట్ చేస్తున్నారా? అయితే మీకు ఒక అదిరిపోయే గుడ్ న్యూస్. మార్కెట్లో బంగారం ధరలు ఊహించని విధంగా కుప్పకూలాయి. కేవలం ఈ ఒక్క జూన్ నెలలోనే పసిడి రేట్లు ఏకంగా 13 శాతం మేర పతనమయ్యాయి. 2008 అక్టోబర్ తర్వాత, అంటే దాదాపు 18 ఏళ్ల కాలంలో ఒకే నెలలో ఇంతటి భారీ పతనాన్ని నమోదు చేయడం ఇదే తొలిసారి. అసలు బంగారం ధరలు ఎందుకు ఇంతలా తగ్గుతున్నాయి? ఆల్-టైమ్ రికార్డ్స్ నుండి ఎంత రేటు పడిపోయింది? ఇప్పుడే కొనేయాలా లేదా ఇంకా తగ్గుతుందా?
గత కొన్ని నెలలుగా సెంచరీల మీద సెంచరీలు కొడుతూ.. సామాన్యుడికి అందనంత ఎత్తుకు వెళ్లిన బంగారం ధరలు, ఇప్పుడు ఒక్కసారిగా నేలచూపులు చూస్తున్నాయి. మల్టీ కమోడిటీ ఎక్స్ఛేంజ్ మార్కెట్లో ఈ ఏడాది ప్రారంభంలో 10 గ్రాముల బంగారం ధర ఏకంగా ₹1,92,991 పలికి ఆల్-టైమ్ రికార్డును క్రియేట్ చేసింది. కానీ ఇప్పుడు సీన్ రివర్స్ అయింది. ఆ రికార్డు గరిష్టాల నుండి బంగారం ధర ఏకంగా ₹50,600 కు పైగా దిగివచ్చింది. అంటే దాదాపు 26 శాతానికి పైగా కరెక్షన్ అయ్యి, ప్రస్తుతం ₹1,42,413 మార్క్ వద్ద ట్రేడ్ అవుతోంది. అంతర్జాతీయ మార్కెట్లో కూడా జనవరి పీక్ స్టేజ్ తో పోలిస్తే ఏకంగా 30 శాతం వరకు ధరలు క్షీణించాయి.
ఇంతకాలం ఆకాశమే హద్దుగా పెరిగిన రేట్లు, ఇప్పుడు ఎందుకు ఇలా కరిగిపోతున్నాయి? దీని వెనుక బలమైన అంతర్జాతీయ కారణాలు ఉన్నాయి. అమెరికాలో ద్రవ్యోల్బణం ఎక్కువగా ఉండటంతో పాటు, అక్కడ వడ్డీ రేట్లు మరింత పెరిగే అవకాశం ఉందనే అంచనాలు గట్టిగా వినిపిస్తున్నాయి. దానికి తోడు అమెరికన్ డాలర్ రోజురోజుకూ పటిష్టంగా మారుతోంది. సాధారణంగా మార్కెట్లో వడ్డీ రేట్లు పెరిగినప్పుడు ఇన్వెస్టర్లు బంగారం వైపు చూడరు. ఎందుకంటే ఫిక్స్డ్ డిపాజిట్లు లేదా బాండ్లలో పెడితే క్రమం తప్పకుండా వడ్డీ రూపంలో ఆదాయం వస్తుంది. కానీ బంగారంలో పెడితే రేటు పెరగాలే తప్ప, ఎలాంటి నెలవారీ ఆదాయం రాదు. అందుకే పెద్ద పెద్ద ఇన్వెస్టర్లు బంగారం నుండి తమ పెట్టుబడులను వెనక్కి తీసుకుని బాండ్లలో పెడుతున్నారు.
ఆర్థిక నిపుణులు చెప్తున్న దాని ప్రకారం.. రాబోయే రోజుల్లో బంగారం ధరలు ఎలా ఉండబోతున్నాయనేది ఈ వారం రాబోయే అమెరికాకు చెందిన రెండు కీలక రిపోర్టులపై ఆధారపడి ఉంది. అవే 'యుఎస్ నాన్-ఫామ్ పేరోల్స్ డేటా', అలాగే 'ISM మ్యానుఫ్యాక్చరింగ్ పీఎంఐ' రిపోర్ట్స్. ఒకవేళ అమెరికాలో ఉద్యోగాల మార్కెట్ బలహీనపడితే, బంగారం ధరలు తిరిగి పుంజుకుని కాస్త పెరిగే ఛాన్స్ ఉంది. అలా కాకుండా అక్కడి జాబ్ మార్కెట్ స్ట్రాంగ్ గా ఉంటే మాత్రం, బంగారం ధరలు మరింత పతనమయ్యే ప్రమాదం ఉందని ఎక్స్ పెర్ట్స్ హెచ్చరిస్తున్నారు.
ధర ₹50,000 వరకు తగ్గింది కదా అని కంగారుపడిపోయి, మీ దగ్గరున్న డబ్బు మొత్తాన్ని ఒకేసారి బంగారంలో పెట్టేయకండి అని నిపుణులు గట్టిగా సలహా ఇస్తున్నారు. మార్కెట్ బాటమ్ అంటే అత్యల్ప ధర.. ఎక్కడ ఉందో ఎవరూ ఊహించలేరు. అందుకే ఒకేసారి కాకుండా.. విడతల వారీగా కొనుగోలు చేయడం బెటర్. గోల్డ్ ఈటీఎఫ్లు, సావరిన్ గోల్డ్ బాండ్లు లేదా డిజిటల్ గోల్డ్ రూపంలో సిస్టమాటిక్ ఇన్వెస్ట్మెంట్ ప్లాన్స్ అంటే ఎస్ఐపీ ద్వారా కొంచెం కొంచెంగా ఇన్వెస్ట్ చేస్తే మార్కెట్ హెచ్చుతగ్గుల నుండి తట్టుకోవచ్చు. ఎట్టకేలకు బంగారం రేట్లు సామాన్యుడికి అందుబాటులోకి రావడం నిజంగా మంచి విషయమే.
