నేటి కాలంలో ఒక సినిమా బాక్సాఫీస్ వద్ద విజయం సాధించాలంటే కేవలం స్టార్ పవర్ ఉంటే సరిపోదు. కథలో ఉండే ప్రతి పాత్ర ప్రాణం పోసుకోవాలి. ముఖ్యంగా బయోపిక్ లు లేదా వాస్తవ సంఘటనల ఆధారంగా తెరకెక్కే చిత్రాల్లో పాత్రధారులు అసలు వ్యక్తులకు ఎంత దగ్గరగా ఉంటే, ప్రేక్షకులు ఆ సినిమాకు అంతలా కనెక్ట్ అవుతారు. ఇప్పుడు సరిగ్గా ఇదే విషయాన్ని నిరూపిస్తున్నారు బాలీవుడ్ ప్రముఖ కాస్టింగ్ డైరెక్టర్ ముఖేష్ ఛాబ్రా.ఇటీవల 'ధురంధర్ 2' సినిమా గురించి ముఖేష్ ఛాబ్రా కొన్ని ఆసక్తికర విషయాలను వెల్లడించారు. ఈ భారీ ప్రాజెక్ట్ కోసం ఏకంగా 300 మందికి పైగా నటీనటులను ఎంపిక చేసినట్లు ఆయన పేర్కొన్నారు.
కేవలం నటుల సంఖ్య మాత్రమే కాదు, వారి ఎంపిక కోసం అనుసరించిన విధానం ఇప్పుడు అందరినీ ఆశ్చర్యపరుస్తోంది. ఈ సినిమాలో ప్రతి పాత్ర అత్యంత సహజంగా ఉండాలని, అందుకోసం నిజ జీవితంలో ఉండే వ్యక్తుల పోలికలను బేస్ చేసుకుని ఆడిషన్స్ నిర్వహించారట.
కాస్టింగ్ ప్రాసెస్ గురించి ఛాబ్రా మాట్లాడుతూ.. "కొన్ని పాత్రల కోసం మాకు ఖచ్చితమైన రూపం కావాల్సి వచ్చింది. అంటే తెరపై చూసినప్పుడు వారు నిజంగా ఆ వ్యక్తిని తలపించాలి. కానీ మరికొన్ని పాత్రల విషయంలో మాత్రం రూపం కంటే కూడా నటనకే ప్రాధాన్యత ఇచ్చాం.
రూపం మరియు ప్రతిభ కలగలిసిన ఈ కాంబినేషన్ వల్ల సినిమాలో ప్రతి క్యారెక్టర్ చాలా రియలిస్టిక్ గా కనిపిస్తుంది" అని తెలిపారు.
సాధారణంగా సినిమాల్లో ముఖ్య పాత్రల మీద మాత్రమే దృష్టి పెడతారు. కానీ 'ధురంధర్ 2' లాంటి భారీ చిత్రాల్లో ప్రతి చిన్న పాత్ర కూడా కథలో కీలకంగా ఉంటుంది. ఒక సినిమా ప్రపంచాన్ని నిర్మించాలంటే, అక్కడ కనిపించే జనం, ఆ వాతావరణం సహజంగా ఉండాలి. ఆ క్రమంలోనే ముఖేష్ ఛాబ్రా టీం దేశవ్యాప్తంగా వందలాది మందిని జల్లెడ పట్టి, పాత్రలకు సరిపోయే వారిని ఎంచుకున్నారు. సినిమా అంటే కేవలం హీరో హీరోయిన్లు మాత్రమే కాదు, అందులో ఉండే చిన్న పాత్రలు కూడా సినిమా విజయానికి ఎంతలా తోడ్పడతాయో ఈ ఎంపిక ప్రక్రియ చూస్తుంటే అర్థమవుతోంది.
