శ్రీకాంత్ ఓదెల, నాని కాంబినేషన్లో వస్తున్న భారీ యాక్షన్ ఎంటర్టైనర్ ‘ది ప్యారడైజ్’ విడుదలపై నీలినీడలు కమ్ముకున్నాయి. షూటింగ్ ఆలస్యంతో పాటు మ్యూజిక్ డైరెక్టర్ అనిరుధ్ బిజీ షెడ్యూల్ కారణంగా సినిమా మరోసారి వాయిదా పడే అవకాశం ఉందనే వార్తలు ఇండస్ట్రీలో హాట్ టాపిక్గా మారాయి. నేచురల్ స్టార్ నాని, మాస్ డైరెక్టర్ శ్రీకాంత్ ఓదెల కాంబినేషన్లో గతంలో వచ్చిన ‘దసరా’ ఎంతటి ఘనవిజయం సాధించిందో అందరికీ తెలిసిందే. ఇప్పుడు వీరిద్దరి కలయికలో వస్తున్న రెండో చిత్రం ‘ది ప్యారడైజ్’ పై భారీ అంచనాలు ఉన్నాయి. ఇదొక హై-వోల్టేజ్ యాక్షన్ డ్రామాగా తెరకెక్కుతోంది. అయితే, ఈ సినిమా విడుదల తేదీ విషయంలో మాత్రం చిత్ర యూనిట్ డైలమాలో ఉండడం నాని అభిమానులను కలవరపెడుతోంది. నిజానికి ఈ చిత్రాన్ని వేసవి కానుకగా విడుదల చేయాలని మేకర్స్ భావించారు. కానీ, షూటింగ్ పనుల్లో జరిగిన ఆలస్యం కారణంగా దీనిని ఆగస్టు 21, 2026కు వాయిదా వేశారు.
ప్రస్తుతం షూటింగ్ శరవేగంగా జరుగుతున్నప్పటికీ, అనుకున్న సమయానికి సినిమా సిద్ధమవుతుందా లేదా అన్న సందేహాలు వ్యక్తమవుతున్నాయి. ముఖ్యంగా పోస్ట్ ప్రొడక్షన్ పనులు మరియు బ్యాక్ గ్రౌండ్ స్కోర్ విషయంలో జాప్యం జరిగే అవకాశం ఉందని సమాచారం. ఈ చిత్రానికి మ్యూజిక్ సెన్సేషన్ అనిరుధ్ రవిచందర్ సంగీతాన్ని అందిస్తున్నారు. ఇప్పటికే విడుదలైన మొదటి పాట ‘ఆయా షేర్’ యూట్యూబ్లో రికార్డులను తిరగరాస్తోంది. మే నెలలో రెండో సింగిల్ను విడుదల చేసేందుకు మేకర్స్ ప్లాన్ చేస్తున్నారు.అయితే, అనిరుధ్ ప్రస్తుతం సౌత్ ఇండియాలోనే మోస్ట్ బిజీ మ్యూజిక్ డైరెక్టర్. ఆయన చేతిలో ప్రస్తుతం అనేక పెద్ద ప్రాజెక్టులు ఉన్నాయి. అనిరుధ్ తన పనిలో క్వాలిటీ కోసం ఎక్కువ సమయం తీసుకుంటాడనే పేరు ఉంది. షూటింగ్ మొత్తం మే నెల చివరి నాటికి పూర్తయితేనే అనిరుధ్ బ్యాక్ గ్రౌండ్ స్కోర్ పై దృష్టి పెట్టగలరు. ఒకవేళ షూటింగ్ ఇంకా ఆలస్యమైతే, అనిరుధ్ డేట్స్ అడ్జస్ట్ కాక సినిమా మళ్ళీ వాయిదా పడే ప్రమాదం ఉంది.
సినిమాను చెప్పిన తేదీకి ప్రేక్షకుల ముందుకు తీసుకురావాలని దర్శకుడు శ్రీకాంత్ ఓదెల తీవ్రంగా శ్రమిస్తున్నారు. కానీ అనిరుధ్ బిజీగా ఉండటం, మరోవైపు భారీ ప్రాజెక్ట్ కావడంతో క్వాలిటీ విషయంలో ఎక్కడా రాజీ పడకూడదని టీమ్ భావిస్తోంది. ఒకవేళ అనిరుధ్ అనుకున్న సమయానికి మ్యూజిక్ వర్క్ పూర్తి చేయకపోతే, ఆగస్టు విడుదల తేదీని మార్చేసి అక్టోబర్ లేదా డిసెంబర్ సీజన్కు వెళ్లే ఆలోచనలో కూడా మేకర్స్ ఉన్నట్లు గుసగుసలు వినిపిస్తున్నాయి. మరి నిజంగానే 'ది ప్యారడైజ్' ఆగస్టు 21న థియేటర్లలోకి వస్తుందా? లేక అనిరుధ్ మ్యూజిక్ కోసం మరికొన్ని రోజులు వెయిట్ చేయాల్సి ఉంటుందా? అన్నది తెలియాలంటే మరికొద్ది రోజులు ఆగాల్సిందే! నాని అభిమానులు మాత్రం ఈ సినిమా కోసం కళ్ళల్లో వత్తులు వేసుకుని ఎదురుచూస్తున్నారు. ఇప్పటికే ‘దసరా’తో నాని మాస్ విశ్వరూపం చూపించారు, ఇప్పుడు ‘ది ప్యారడైజ్’తో అంతకు మించి ఉంటుందని ఆశిస్తున్నారు. విడుదల ఆలస్యమైనా పర్వాలేదు కానీ, సినిమా మాత్రం బ్లాక్ బస్టర్ అవ్వాలని సోషల్ మీడియాలో కామెంట్స్ చేస్తున్నారు.
