ప్రపంచం కోవిడ్-19 మహమ్మారి తెచ్చిన నష్టాల నుండి ఇప్పుడిప్పుడే పూర్తిగా కోలుకుంటోంది అనుకునేలోపే.. మరో ప్రాణాంతక వైరస్ ప్రపంచ దేశాలను గజగజ వణకిస్తోంది. అదే.. ఎబోలా. అవును, ఆఫ్రికా ఖండంలో ఎబోలా వైరస్ మళ్లీ విపరీతంగా విజృంభిస్తోంది. పరిస్థితి ఎంత తీవ్రంగా ఉందంటే, ప్రపంచ ఆరోగ్య సంస్థ దీనిని "అంతర్జాతీయ ప్రజారోగ్య అత్యవసర పరిస్థితి" గా ప్రకటించింది. అసలు ఆఫ్రికాలో ఏం జరుగుతోంది..? ఈసారి వచ్చిన ఎబోలా వైరస్ మునుపటి కంటే ప్రమాదకరమైనదా..? దీనివల్ల మన భారతదేశానికి ఏమైనా ముప్పు ఉందా..? ఈ తాజా ఎబోలా సంక్షోభం ఆఫ్రికా దేశమైన డెమొక్రాటిక్ రిపబ్లిక్ ఆఫ్ కాంగో లోని 'ఇటూరి' అనే ప్రాంతంలో మొదలైంది. అక్కడ చాలా వేగంగా కేసులు పెరుగుతుండటంతో అధికారులు అప్రమత్తమయ్యారు. కానీ దురదృష్టవశాత్తూ, ఈ వైరస్ కాంగో సరిహద్దులు దాటి పొరుగు దేశమైన ఉగాండాకు కూడా పాకేసింది. ఇప్పటివరకు వందల సంఖ్యలో అనుమానిత కేసులు నమోదు కాగా, అధికారిక లెక్కల ప్రకారమే 80 మందికి పైగా ప్రాణాలు కోల్పోయారు. అయితే అసలు సంఖ్య దీనికంటే చాలా ఎక్కువే ఉండవచ్చని నిపుణులు అంచనా వేస్తున్నారు.
ఇక్కడ మనం ఒక ముఖ్యమైన విషయం అర్థం చేసుకోవాలి. గతంలో ఎబోలా వచ్చినప్పుడు దానికి 'జైర్' అనే స్ట్రెయిన్ కారణం. దానికి ప్రపంచవ్యాప్తంగా వ్యాక్సిన్లు అందుబాటులో ఉన్నాయి. కానీ, ప్రస్తుతం ఆఫ్రికాలో కలకలం రేపుతున్నది 'బుందిబుగ్యో' అనే అరుదైన ఎబోలా స్ట్రెయిన్. ఈ బుందిబుగ్యో స్ట్రెయిన్ కి ఉన్న అతిపెద్ద మైనస్ ఏంటంటే.. దీనికి మార్కెట్లో ఎలాంటి అధికారిక వ్యాక్సిన్ కానీ, స్పష్టమైన చికిత్స కానీ అందుబాటులో లేదు. అంటే, ఈ వైరస్ గనుక ఒకసారి శరీరంలోకి ప్రవేశిస్తే, కేవలం మన రోగనిరోధక శక్తి మీద ఆధారపడి మాత్రమే బతకాలి.అందుకే ఈ వైరస్ సోకిన ప్రతి 10 మందిలో ముగ్గురు నుండి నలుగురు చనిపోతున్నారు. అంటే దీని మరణాల రేటు దాదాపు 30% నుండి 40% వరకు ఉంది. అసలు ఈ ఎబోలా వైరస్ ఎక్కడి నుండి వస్తుంది..? ఇది ఒక జూనోటిక్ వ్యాధి. అంటే జంతువుల నుండి మనుషులకు వ్యాపిస్తుంది. అడవిలో ఉండే ఫ్రూట్ బ్యాట్స్ అంటే.. గబ్బిలాలు, కోతులు, చింపాంజీల ద్వారా ఇది మొదట మనుషులకు సోకుతుంది. ఒకసారి ఒక మనిషికి ఈ వైరస్ సోకిన తర్వాత.. అది మనుషుల మధ్య చాలా వేగంగా వ్యాపిస్తుంది.
అయితే గుర్తుంచుకోండి, ఇది కరోనా లాగా గాలి ద్వారా వ్యాపించదు. సోకిన వ్యక్తి యొక్క రక్తం, లాలాజలం, వాంతులు, మూత్రం, స్వేదం వంటి శరీర ద్రవాల ద్వారా మాత్రమే ఒకరి నుండి ఒకరికి నేరుగా వ్యాపిస్తుంది. అలాగే సోకిన వ్యక్తి వాడిన బట్టలు, సూదులు లేదా బెడ్స్ తాకడం వల్ల కూడా ఇతరులకు వచ్చే ప్రమాదం ఉంది. ఒకవేళ ఎబోలా వైరస్ శరీరంలోకి ప్రవేశిస్తే.. 2 నుండి 21 రోజుల్లో లక్షణాలు బయటపడతాయి. మొదట తీవ్రమైన జ్వరం వస్తుంది. దాంతో పాటు విపరీతమైన ఒళ్లు నొప్పులు, తలనొప్పి, గొంతు నొప్పి ఉంటాయి. వ్యాధి కొంచెం ముదిరిన తర్వాత వాంతులు, విరేచనాలు అవుతాయి.అన్నిటికంటే భయంకరమైన చివరి స్టేజ్ ఏంటంటే.. హెమరేజిక్ ఫీవర్.
ఈ స్టేజ్లో రోగికి శరీరం లోపల, అలాగే ముక్కు, నోరు, కళ్ల నుండి రక్తం కారడం మొదలవుతుంది. దీనివల్ల లోపల ఉన్న ముఖ్యావయవాలు ఫెయిల్ అయిపోయి మనిషి చనిపోతాడు. అందుకే దీనిని అత్యంత క్రూరమైన వైరస్గా అభివర్ణిస్తారు. ఇప్పుడు అందరినీ వేధిస్తున్న అతిపెద్ద ప్రశ్న.. ఈ వైరస్ భారతదేశానికి వస్తుందా? మన దేశానికి ఏమైనా ముప్పు ఉందా? ప్రస్తుతానికి భారతదేశంలో ఎలాంటి ఎబోలా కేసు నమోదు కాలేదు, మనం పూర్తిగా సురక్షితంగానే ఉన్నాం.మన దేశంలో స్వదేశీ ఎబోలా వైరస్ పుట్టే అవకాశం లేదు. కానీ, అంతర్జాతీయ ప్రయాణాలు పెరిగిపోయిన ఈ రోజుల్లో, ఆఫ్రికా దేశాల నుండి ఎవరైనా ప్రయాణికులు వైరస్ మోసుకొచ్చే ప్రమాదం ఉంది.
అందుకే భారత ప్రభుత్వం మరియు కేంద్ర ఆరోగ్య శాఖ ఇప్పటికే అప్రమత్తమయ్యాయి. అంతర్జాతీయ విమానాశ్రయాల్లో ముఖ్యంగా ఆఫ్రికా నుండి వచ్చే ప్రయాణికులకు థర్మల్ స్క్రీనింగ్ మరియు హెల్త్ చెకప్స్ చేసేలా నిఘా పెంచేందుకు ఏర్పాట్లు చేస్తున్నారు. ఎబోలా అనేది నిజంగానే ఒక భయంకరమైన వైరస్. కానీ మనం భయపడాల్సిన అవసరం లేదు, అప్రమత్తంగా ఉంటే చాలు. WHO మరియు అంతర్జాతీయ శాస్త్రవేత్తలు ఈ 'బుందిబుగ్యో' స్ట్రెయిన్కు వ్యతిరేకంగా పని చేసే వ్యాక్సిన్లను వీలైనంత త్వరగా తీసుకురావడానికి రాత్రింబగళ్లు శ్రమిస్తున్నారు. ఆఫ్రికాలో ఈ సంక్షోభం త్వరలోనే ముగుస్తుందని ఆశిద్దాం.
