ప్రస్తుతం సోషల్ మీడియాలో మరియు సినీ వర్గాల్లో ఒక ఆసక్తికరమైన చర్చ నడుస్తోంది. ఒకవైపు భారీ అంచనాల మధ్య విడుదలైన 'ధురంధర్-2' సినిమాకు ప్రశంసలు దక్కుతుంటే, మరోవైపు కన్నడ స్టార్ నటి మరియు మాజీ ఎంపీ రమ్య ఈ చిత్రంపై చేసిన విమర్శలు ఇప్పుడు హాట్ టాపిక్ అయ్యాయి. సినిమాను ఏకిపారేస్తూ ఆమె చేసిన ట్వీట్ ప్రస్తుతం వైరల్ గా మారింది. సాధారణంగా నటీనటులు ఇతర సినిమాలపై బహిరంగంగా విమర్శలు చేయడానికి సంకోచిస్తారు. కానీ రమ్య మాత్రం చాలా ఘాటుగా స్పందించారు. "ఇప్పుడే ధురంధర్-2 సినిమా చూశాను. ఇది నా ఓపికకు పరీక్ష పెట్టింది" అంటూ తన అసహనాన్ని వ్యక్తం చేశారు.
సినిమా ఏమాత్రం ఆకట్టుకోలేదని, చూస్తున్నంత సేపు ఒక బోరింగ్ సబ్జెక్ట్ చదివినట్లు అనిపించిందని ఆమె పేర్కొన్నారు. ప్రేక్షకులకు హెచ్చరిక జారీ చేస్తూ, "ఈ మూవీ చూసి మీ అమూల్యమైన సమయాన్ని, కష్టపడి సంపాదించిన డబ్బును వృథా చేసుకోవద్దు" అని ఆమె సూచించారు. ముఖ్యంగా దర్శకుడు ఆదిత్య ధర్ గురించి ప్రస్తావిస్తూ రమ్య వివాదాస్పద వ్యాఖ్యలు చేశారు. "డైరెక్టర్ ఆదిత్య ధర్.. మీ మితిమీరిన జాతీయవాదం, దుష్ప్రచారాన్ని ఇకనైనా ఆపండి" అని ట్వీట్ లో పేర్కొన్నారు. సినిమాలో చూపించిన అంశాలు వాస్తవాలకు దూరంగా ఉన్నాయని, కేవలం ఒక వర్గాన్ని ప్రసన్నం చేసుకోవడానికే ఇలాంటి సినిమాలు తీస్తున్నారని ఆమె అభిప్రాయపడినట్లు కనిపిస్తోంది.
రమ్య చేసిన ఈ వ్యాఖ్యలపై నెటిజన్లు భిన్నాభిప్రాయాలు వ్యక్తం చేస్తున్నారు. కొందరు ఆమెకు మద్దతు తెలుపుతుండగా, మరికొందరు 'ధురంధర్-2' దేశభక్తిని చాటిచెప్పే సినిమా అని, ఆమె విమర్శలు రాజకీయ ప్రేరేపితమని ఆరోపిస్తున్నారు. సినిమా రివ్యూల విషయంలో రమ్య ఇంత బోల్డ్ గా స్పందించడం ఇప్పుడు ఇండస్ట్రీలో చర్చనీయాంశమైంది.
మొత్తానికి, బాక్సాఫీస్ వద్ద కలెక్షన్ల పరంగా ఎలా ఉన్నా, విమర్శల పరంగా మాత్రం 'ధురంధర్-2' ఒక పెద్ద యుద్ధానికే తెరలేపింది. నటి రమ్య విమర్శలకు చిత్ర యూనిట్ ఎలా స్పందిస్తుందో వేచి చూడాలి.
