బాలీవుడ్ ఎనర్జిటిక్ స్టార్ రణవీర్ సింగ్ నటించిన లేటెస్ట్ యాక్షన్ ఎంటర్టైనర్ 'ధురంధర్-2' బాక్సాఫీస్ వద్ద కాసుల వర్షం కురిపిస్తోంది. మొదటి రోజు నుంచే పాజిటివ్ టాక్తో దూసుకుపోతున్న ఈ చిత్రం, కేవలం రెండు రోజుల్లోనే ఊహించని రీతిలో భారీ వసూళ్లను రాబట్టి ట్రేడ్ వర్గాలను విస్మయానికి గురిచేస్తోంది. రివెంజ్ డ్రామాగా వచ్చిన ఈ సినిమాకు ప్రేక్షకులు బ్రహ్మరథం పడుతున్నారు.'ధురంధర్-2' విడుదలైన రెండు రోజుల్లోనే ప్రపంచవ్యాప్తంగా 331 కోట్ల గ్రాస్ కలెక్షన్లను సాధించింది. రణవీర్ సింగ్ కెరీర్లోనే ఇది బిగ్గెస్ట్ ఓపెనర్ గా నిలవడమే కాకుండా, ఇండియన్ సినిమా హిస్టరీలో ఒక సంచలనంగా మారింది.
ఈ సినిమా ప్రీవ్యూల నుంచే తన సత్తా చాటుకోవడం విశేషం. ఇండియాలో ప్రీవ్యూల ద్వారానే దాదాపు 51 కోట్లు సాధించిన ఈ చిత్రం, తొలి రోజున ఏకంగా 121 కోట్లు వసూలు చేసి అందరినీ ఆశ్చర్యపరిచింది. రెండో రోజు కూడా తన జోరును కొనసాగిస్తూ 96 కోట్ల గ్రాస్ వసూళ్లను రాబట్టింది. రణవీర్ పర్ఫార్మెన్స్కు తోడు, మేకింగ్ వాల్యూస్ అద్భుతంగా ఉండటంతో ప్రేక్షకులు థియేటర్లకు క్యూ కడుతున్నారు. ప్రస్తుతం వీకెండ్ నడుస్తుండటంతో కలెక్షన్లు ఇంకా పెరిగే అవకాశం ఉందని విశ్లేషకులు చెబుతున్నారు. ఆదివారం ముగిసే సమయానికి ఈ చిత్రం ఈజీగా 500 కోట్ల క్లబ్లో చేరుతుందని అంచనా వేస్తున్నారు. కేవలం మూడు రోజుల్లోనే ఈ మైలురాయిని అందుకోవడం అంటే అది మామూలు విషయం కాదు.
హిందీ బెల్ట్ తో పాటు సౌత్ ఇండియాలో కూడా ఈ చిత్రానికి మంచి ఆదరణ లభిస్తోంది. ఈ సినిమాలో రణవీర్ సింగ్ నటన, యాక్షన్ సీక్వెన్స్ లు హైలైట్ గా నిలిచాయి. దర్శకుడి మేకింగ్ స్టైల్ మరియు సినిమాటోగ్రఫీ సినిమాకు ప్రధాన బలంగా మారాయి. ముఖ్యంగా క్లైమాక్స్ యాక్షన్ ఎపిసోడ్స్ థియేటర్లలో ప్రేక్షకులకు పూనకాలు తెప్పిస్తున్నాయని సోషల్ మీడియా పబ్లిక్ టాక్స్ లో గట్టిగా వినిపిస్తోంది. మొత్తానికి 'ధురంధర్-2' బాక్సాఫీస్ వద్ద తిరుగులేని రారాజుగా నిలిచింది. భారీ బడ్జెట్తో తెరకెక్కిన ఈ రివెంజ్ యాక్షన్ థ్రిల్లర్, రణవీర్ సింగ్కు ఒక సాలిడ్ హిట్ అందించడమే కాకుండా, బాక్సాఫీస్ వద్ద పాత రికార్డులను తిరగరాస్తోంది.
