సినీ ఇండస్ట్రీలో నిత్యం ఎన్నో రకాల వార్తలు వింటూ ఉంటాం. కానీ కొన్ని విషయాలు మాత్రం కేవలం సినిమా రంగానికే కాకుండా, మనందరి నిత్య జీవితానికి కూడా చాలా దగ్గరగా అనిపిస్తాయి. అలాంటి ఒక హాట్ టాపిక్ ఇప్పుడు సోషల్ మీడియాలో విపరీతంగా వైరల్ అవుతోంది. అదేంటి అంటే.. నటి అనుపమ పరమేశ్వరన్ తన పర్సనల్ లైఫ్పై చేసిన షాకింగ్ కామెంట్స్, దానికి మరో నటి అదితి శంకర్ ఇచ్చిన స్ట్రాంగ్ సపోర్ట్! 'ప్రేమమ్', 'శతమానం భవతి' వంటి సినిమాలతో తెలుగు ప్రేక్షకుల గుండెల్లో స్థానం సంపాదించుకున్న అనుపమ పరమేశ్వరన్ ఇటీవల ఒక ఇంటర్వ్యూలో తన పర్సనల్ లైఫ్ గురించి మాట్లాడారు. ఎవరి పేరునూ నేరుగా చెప్పకపోయినా.. తన మాజీ బాయ్ఫ్రెండ్ వల్ల తాను అనుభవించిన మానసిక వేదనను బయటపెట్టారు.
సుమారు రెండేళ్ల పాటు ఆ బంధంలో తాను తీవ్రమైన నరకం చూశానని ఆవేదన వ్యక్తం చేశారు. ఆ వ్యక్తి ప్రవర్తన వల్ల ఒక నటిగా, ఒక మహిళగా తనను తాను నిందించుకునే పరిస్థితికి దిగజారిపోయానని చెప్పారు. "నేనేం తప్పు చేశాను? నాలోనే లోపం ఉందా?" అని ప్రతిరోజూ మథనపడిపోయానని ఆమె తెలిపారు. ఒక గ్లామరస్ సినీ సెలబ్రిటీ స్క్రీన్ వెనుక ఇంతటి మానసిక క్షోభ అనుభవించిందా అని అభిమానులంతా ఆశ్చర్యపోయారు.అనుపమ చేసిన ఈ వ్యాఖ్యలపై సోషల్ మీడియాలో భిన్నమైన అభిప్రాయాలు వ్యక్తమయ్యాయి. అయితే, కోలీవుడ్ డైరెక్టర్ శంకర్ కుమార్తె, హీరోయిన్ అదితి శంకర్ మాత్రం అనుపమకు పూర్తి మద్దతుగా నిలిచారు. తన కొత్త సినిమా 'వన్స్మోర్' ప్రచారంలో భాగంగా మాట్లాడిన అదితి.. అనుపమ ధైర్యాన్ని మనస్ఫూర్తిగా అభినందించారు.
"అనుపమ ఇంటర్వ్యూ నేను చూశాను. ఆమె పంచుకున్న మాటల్లో ఎంతో నిజాయితీ ఉంది. ఎవరినీ కించపరచడం లేదా నిందించడం ఆమె ఉద్దేశం కాదు. తన జీవితంలో ఎదుర్కొన్న ఒక ఇబ్బందిని సమాజంతో పంచుకోవడానికి చాలా ధైర్యం కావాలి. అందుకు అనుపమకు హ్యాట్సాఫ్ చెప్పాల్సిందే" అని అదితి పేర్కొన్నారు. ఈ సందర్భంగా అదితి శంకర్ ఒక ముఖ్యమైన విషయాన్ని గుర్తుచేశారు. నేటి సమాజంలో చాలామంది యువతీ యువకులు టాక్సిక్ రిలేషన్షిప్స్ లో చిక్కుకుని నరకం అనుభవిస్తున్నారు. బయటకు నవ్వుతూ కనిపిస్తున్నప్పటికీ.. లోపల మానసికంగా నలిగిపోతున్నారు. అనుపమలాంటి పబ్లిక్ ఫిగర్స్ ఇలాంటి విషయాలపై ఓపెన్గా మాట్లాడటం వల్ల.. అలాంటి పరిస్థితుల్లో ఉన్న మిగతా వారికి కూడా ఒక కంటివిప్పులా ఉంటుందని, తమ బంధం సరైనదా కాదా అనే దానిపై ఒక స్పష్టత వస్తుందని అదితి వ్యాఖ్యానించారు.
ఏది ఏమైనా, గ్లామర్ ప్రపంచంలో ఉంటూ కూడా తమ బలహీనతలను, అనుభవించిన కష్టాలను దాచుకోకుండా నిజాయితీగా బయటకు చెప్పడం నిజంగా అభినందించదగిన విషయమే. అనుపమ వ్యక్తంచేసిన ధైర్యానికి నెటిజన్లు, అభిమానులు పెద్ద ఎత్తున సపోర్ట్ ఇస్తున్నారు.
