భారతదేశ చరిత్రలో 26/11 ముంబై ఉగ్రదాడులు ఎప్పటికీ మాయని గాయం. ఆ రోజు జరిగిన మారణకాండను తలచుకుంటే ఇప్పటికీ ఒళ్లు గగుర్పొడుస్తుంది. సామాన్య ప్రజలే కాదు, ఎందరో సినీ ప్రముఖులు కూడా ఆ భయంకరమైన రాత్రికి సాక్ష్యులుగా నిలిచారు. తాజాగా బాలీవుడ్ నటుడు అర్జున్ రాంపాల్ ఆనాటి చేదు జ్ఞాపకాలను గుర్తు చేసుకుంటూ చేసిన వ్యాఖ్యలు ఇప్పుడు సోషల్ మీడియాలో వైరల్ అవుతున్నాయి.
ధురంధర్ 2 ప్రమోషన్స్లో భాగంగా ఆయన ఈ ఆసక్తికర విషయాలను పంచుకున్నారు.
నవంబర్ 26వ తేదీ అర్జున్ రాంపాల్ పుట్టినరోజు కావడంతో, ఆ రోజు రాత్రి ఆయన తన స్నేహితులతో కలిసి వేడుకలు జరుపుకోవాలని ప్లాన్ చేసుకున్నారు. ఆ సమయంలో అర్జున్ వర్లీలోని 'ఫోర్ సీజన్స్' హోటల్లో ఉన్నారు. అక్కడి నుండి ఆయన తన బర్త్డే డిన్నర్ కోసం 'తాజ్ హోటల్'కు బయలుదేరాల్సి ఉంది. సరిగ్గా అదే సమయంలో ముంబై నగరంపై ఉగ్రవాదులు విరుచుకుపడ్డారు.
"నేను తాజ్ హోటల్కు వెళ్లేందుకు సిద్ధమవుతుండగా, ఒక్కసారిగా వాతావరణం మారిపోయింది. హోటల్ చుట్టూ భారీ బందోబస్తు ఏర్పాటు చేసి, ఎవ్వరినీ బయటకు వెళ్లనివ్వలేదు.
ముంబైపై దాడులు జరుగుతున్నాయని తెలియగానే షాక్కు గురయ్యాను. నేను వెళ్లాల్సిన చోట ఉగ్రవాదులు తూటాల వర్షం కురిపిస్తున్నారనే వార్త వినగానే ప్రాణాలు అరచేతిలో పెట్టుకున్నాను" అని అర్జున్ రాంపాల్ ఆ భయానక క్షణాలను గుర్తు చేసుకున్నారు. ఆ అనుభవం అర్జున్ రాంపాల్పై తీవ్ర ప్రభావం చూపింది. ఆనాటి ఉగ్రవాదులపై ఉన్న కోపాన్ని, దేశభక్తిని తన కొత్త సినిమా 'ధురంధర్'లో చూపించానని ఆయన పేర్కొన్నారు. ఈ సినిమాకు ఆదిత్య ధర్ దర్శకత్వం వహించారు. దర్శకుడు ఆదిత్య ధర్ నాకు 26/11 నేపథ్యంలో సాగే సీన్ను వివరించినప్పుడు, నాకు ఆనాటి జ్ఞాపకాలన్నీ గుర్తొచ్చాయి. అప్పుడు నేను అనుభవించిన భయాన్ని, కోపాన్ని ఈ పాత్ర ద్వారా వెళ్లగక్కే అవకాశం దొరికిందని భావించాను. ధురంధర్ సినిమాలో నా నటన ద్వారా ఉగ్రవాదంపై నా ప్రతీకారాన్ని తీర్చుకున్నాను. ఈ సినిమా కేవలం ఒక యాక్షన్ మూవీ మాత్రమే కాదు, అది నా భావోద్వేగం" అని అర్జున్ స్పష్టం చేశారు.
