తెలుగు సినిమా పరిశ్రమలో తనదైన నటనతో, హోమ్లీ లుక్స్తో ఎంతోమంది ప్రేక్షకుల మనసులను గెలుచుకున్న సీనియర్ నటి 'లయ' గురించి ప్రత్యేకంగా పరిచయం అవసరం లేదు. ఎన్నో విజయవంతమైన చిత్రాల్లో హీరోయిన్గా నటించి తనకంటూ ఒక ప్రత్యేక గుర్తింపు తెచ్చుకున్న ఆమె, కెరీర్ మంచి ఫామ్లో ఉండగానే వివాహం చేసుకుని సినిమాలకు దూరమయ్యారు. చాలా సంవత్సరాల విరామం తర్వాత మళ్లీ రీ-ఎంట్రీ ఇచ్చిన లయ, ప్రస్తుతం వరుస సినిమాల్లో నటిస్తూ ప్రేక్షకులను అలరిస్తున్నారు.తాజాగా ఓ ఇంటర్వ్యూలో పాల్గొన్న లయ.. వయసు పెరిగినా తన అందం, ఫిట్నెస్ను ఎలా కాపాడుకుంటున్నారనే విషయంపై కొన్ని ఆసక్తికర వ్యాఖ్యలు చేశారు. ఆ విశేషాలు ఇప్పుడు సోషల్ మీడియాలో వైరల్ అవుతున్నాయి.
చాలామంది అమ్మాయిలు పెళ్లికి ముందు అందంగా, ఫిట్గా కనిపించేందుకు క్రమం తప్పకుండా వర్కౌట్లు చేస్తుంటారు. కానీ పెళ్లి తర్వాత అదే డెడికేషన్ను కొనసాగించరు. నటి లయ కూడా తన జీవితంలో ఇలాంటి పరిస్థితినే ఎదుర్కొన్నట్లు చెప్పుకొచ్చారు.
"నేను కూడా పెళ్లి తర్వాత జిమ్కు వెళ్లడం, వ్యాయామాలు చేయడం చాలా వరకు తగ్గించేశాను. కేవలం ఫిట్నెస్ మాత్రమే కాదు, కొత్త బట్టలపై కూడా నాకు ఆసక్తి తగ్గిపోయింది. అయితే కొంతకాలం తర్వాత ఎందుకు ఇలా ఉండాలి అనిపించింది." అని లయ పేర్కొన్నారు.
ఎప్పుడూ వ్యాయామం చేస్తూ ఉంటే కేవలం అందంగా ఉండటమే కాకుండా ఎంతో ఆరోగ్యంగానూ ఉండొచ్చని, అలాగే అనేక రకాల అనారోగ్య సమస్యలు కూడా దూరంగా ఉంటాయని ఆమె గ్రహించారు. మళ్లీ తన లైఫ్ స్టైల్ను మార్చుకోవాలని నిర్ణయించుకున్న లయ, వ్యాయామాలు చేయడం ప్రారంభించారు.
ముఖ్యంగా ఆమెకు ఎంతో ఇష్టమైన డాన్స్ వైపు మొగ్గు చూపారు. ప్రస్తుతం ఆమె డాన్స్ చేస్తూ రీల్స్ రూపొందించి వాటిని సోషల్ మీడియాలో పోస్ట్ చేస్తున్నారు. ఈ రీల్స్ నెటిజన్లను ఎంతగానో ఆకట్టుకుంటున్నాయి. డాన్స్ చేయడం వల్ల మనసు ఎంతో ప్రశాంతంగా, ఉల్లాసంగా ఉంటుంది. ఇది ఒత్తిడిని దూరం చేస్తుంది. ఏదైనా కారణంతో జిమ్కు వెళ్లడం మానేసినా, డాన్స్ రీల్స్ చేయడం మాత్రం ఎప్పటికీ మాననని ఆమె స్పష్టం చేశారు. ఎందుకంటే డాన్స్ చేయడం వల్ల ఒక మంచి వ్యాయామం చేసిన ప్రయోజనం లభిస్తుంది. దీనితో బాడీ ఎల్లప్పుడూ ఫిట్గా ఉండటమే కాకుండా, అనేక అనారోగ్య సమస్యలకు కూడా దూరంగా ఉండొచ్చు."అందుకే నేను డాన్స్ వీడియోలు చేయడాన్ని ఎప్పుడూ కొనసాగిస్తాను" అని లయ ఈ సందర్భంగా సంతోషంగా చెప్పుకొచ్చారు. పెళ్లి తర్వాత చాలామంది మహిళలు తమ ఆరోగ్యాన్ని, ఫిట్నెస్ను నిర్లక్ష్యం చేస్తుంటారు. అలాంటి వారికి లయ చెప్పిన విషయాలు ఒక గొప్ప ఇన్స్పిరేషన్ అని చెప్పవచ్చు. జిమ్ వర్కౌట్లు బోర్ కొడితే, డాన్స్ వంటి ఇష్టమైన వ్యాపకాలను వ్యాయామంగా మార్చుకుని ఎలా ఫిట్గా ఉండవచ్చో లయ నిరూపించారు.
