పవర్ స్టార్ పవన్ కళ్యాణ్ మరియు దర్శకుడు హరీష్ శంకర్ కాంబినేషన్లో వస్తున్న అత్యంత ప్రతిష్టాత్మక చిత్రం ‘ఉస్తాద్ భగత్ సింగ్’. ‘గబ్బర్ సింగ్’ వంటి ఇండస్ట్రీ హిట్ తర్వాత వీరిద్దరి కలయికలో వస్తున్న సినిమా కావడంతో, తాజాగా విడుదలైన ట్రైలర్ సోషల్ మీడియాను ఊపేస్తోంది. పవన్ కళ్యాణ్ ‘గబ్బర్ సింగ్’ మేనరిజమ్స్, హరీష్ శంకర్ మార్క్ డైలాగ్స్.. ఈ రెండూ కలిస్తే ఎలా ఉంటుందో ‘ఉస్తాద్ భగత్ సింగ్’ ట్రైలర్ మరోసారి నిరూపించింది. సుదీర్ఘ నిరీక్షణ తర్వాత విడుదలైన ఈ ట్రైలర్, అభిమానులకు పూనకాలు తెప్పించేలా ఉంది.
ముఖ్యంగా ఇందులో పవన్ కళ్యాణ్ బాడీ లాంగ్వేజ్ మరియు పొలిటికల్ టచ్ ఉన్న డైలాగ్స్ సినిమాపై అంచనాలను అమాంతం పెంచేశాయి. ఈ సినిమాలో పవన్ కళ్యాణ్ ఒక నిజాయితీ గల పోలీస్ ఆఫీసర్గా, పాతబస్తీలోని మహంకాళి పోలీస్ స్టేషన్లో విధులు నిర్వహిస్తున్నట్లు చూపించారు. "ఇచ్చిపడేసే గోత్రం.. ఇరగదీసే నక్షత్రం" అంటూ పవన్ చెప్పే డైలాగ్ ట్రైలర్కే హైలైట్గా నిలిచింది. ఒక గిరిజన కుర్రాడు తన గురువు స్పూర్తితో 'భగత్ సింగ్'గా మారి, సమాజంలోని అన్యాయంపై ఎలా పోరాడాడు అనే ఆసక్తికరమైన పాయింట్తో ఈ సినిమా తెరకెక్కినట్లు అర్థమవుతోంది. దర్శకుడు హరీష్ శంకర్కు పవన్ కళ్యాణ్ను ఎలా చూపించాలో బాగా తెలుసు.
పవన్ మాస్ మేనరిజమ్స్ను వాడుకోవడంలో ఆయన దిట్ట. ట్రైలర్లో ప్రతి ఫ్రేమ్ కూడా పవర్ఫుల్గా ఉంది. ముఖ్యంగా పవన్ కళ్యాణ్ ప్రస్తుతం ఆంధ్రప్రదేశ్ డిప్యూటీ సీఎం హోదాలో ఉన్న నేపథ్యంలో, ఆయన గౌరవానికి భంగం కలగకుండా, అదే సమయంలో మాస్ ఆడియన్స్కు కావాల్సిన వినోదాన్ని పక్కాగా ప్లాన్ చేసినట్లు కనిపిస్తోంది. ట్రైలర్లో హీరోయిన్ శ్రీలీల తన గ్లామర్ మరియు ఎనర్జీతో ఆకట్టుకోగా, రాశీ ఖన్నా ఒక కీలక పాత్రలో కనిపిస్తున్నారు. విలన్గా పార్తీబన్ మరియు అశుతోష్ రాణా పవర్ఫుల్గా కనిపిస్తున్నారు. సినిమా నిడివి కూడా 2 గంటల 34 నిమిషాలుగా లాక్ చేయడం, స్క్రీన్ ప్లే వేగంగా ఉంటుందనే సంకేతాలను ఇస్తోంది. దేవి శ్రీ ప్రసాద్ అందించిన సాంగ్స్ ఇప్పటికే చార్ట్బస్టర్లుగా నిలిచాయి. అయితే ట్రైలర్లో ఎస్.ఎస్. థమన్ అందించిన బ్యాక్ గ్రౌండ్ స్కోర్ ప్రతి సీన్ను ఎలివేట్ చేసింది.
అయనంకా బోస్ సినిమాటోగ్రఫీ సినిమాను చాలా రిచ్గా చూపిస్తోంది. మైత్రీ మూవీ మేకర్స్ నిర్మాణ విలువలు ప్రతి ఫ్రేమ్లోనూ స్పష్టంగా కనిపిస్తున్నాయి. ఉగాది కానుకగా మార్చి 19, 2026న ఈ సినిమా ప్రపంచవ్యాప్తంగా విడుదల కానుంది. ట్రైలర్ చూశాక పవన్ ఫ్యాన్స్ థియేటర్లలో రచ్చ చేయడం ఖాయమనిపిస్తోంది. ‘గబ్బర్ సింగ్’ మ్యాజిక్ను హరీష్ శంకర్ మరోసారి రిపీట్ చేస్తారని ట్రేడ్ వర్గాలు విశ్లేషిస్తున్నాయి. ఉస్తాద్ భగత్ సింగ్’ కేవలం ఒక యాక్షన్ సినిమా మాత్రమే కాదు, ఇది పవన్ కళ్యాణ్ స్వాగ్ను ఇష్టపడే అభిమానులకు ఒక పండుగ. ట్రైలర్తోనే విధ్వంసం మొదలుపెట్టిన ఉస్తాద్, బాక్సాఫీస్ వద్ద ఎన్ని రికార్డులను తిరగరాస్తాడో చూడాలి.
