గత ఎనిమిదేళ్లుగా టాలీవుడ్లో ఒకటే చర్చ.. విజయ్ దేవరకొండ, రష్మిక మందన్న ఎప్పుడు పెళ్లి చేసుకుంటారు అని? ఆ నిరీక్షణకు ఫిబ్రవరి 26, 2026న తెరపడింది. రాజస్థాన్లోని ఉదయ్పూర్లో వీరిద్దరూ ఒక్కటయ్యారు. పెళ్లి తర్వాత విజయ్ సోషల్ మీడియాలో పెట్టిన పోస్ట్ ఇప్పుడు ఇంటర్నెట్ను షేక్ చేస్తోంది.
విజయ్ తన ఇన్స్టాగ్రామ్లో పెళ్లి ఫోటోలను షేర్ చేస్తూ చాలా ఎమోషనల్ నోట్ రాశాడు. 'ఒకరోజు నాకు తను చాలా గుర్తొచ్చింది. తను పక్కన ఉంటే నా రోజు ఇంకా బాగుండేది అనిపించింది.నేను భోజనం చేసేటప్పుడు తను ఎదురుగా ఉంటే ఆ భోజనానికి ఒక పరిపూర్ణత వస్తుందని, వర్కౌట్ చేసేటప్పుడు తను తోడుంటే ఆ కష్టం తెలియదని అనిపించింది. నేను ఎక్కడున్నా సరే నా ఇంటి దగ్గర ఉన్నామన్న ప్రశాంతత కోసం నాకు తను కావాలని అర్థమైంది. అందుకే.. నా బెస్ట్ ఫ్రెండ్ని నా భార్యగా చేసుకున్నాను' అంటూ 26.02.2026 డేట్తో పోస్ట్ చేశాడు. విజయ్ రాసిన ఈ మాటలు చూస్తుంటే రష్మికపై ఆయనకు ఉన్న ప్రేమ ఎంత గాఢమైనదో అర్థమవుతోంది. అటు రష్మిక కూడా తన 'విజ్జు' గురించి చాలా అందంగా రాసుకొచ్చింది. 'నా లవ్స్.. మీకు నా భర్త విజయ్ దేవరకొండను పరిచయం చేస్తున్నాను. నిజమైన ప్రేమ అంటే ఏంటో, మనశ్శాంతి అంటే ఏంటో నాకు నేర్పిన వ్యక్తి ఇతను.
పెద్ద కలలు కనడం తప్పు కాదని, నా మీద నాకే నమ్మకం కలిగించిన వ్యక్తి. విజ్జు.. నీ గురించి చెప్పడానికి నాకు మాటలు సరిపోవు. నా విజయాలు, కష్టాలు, సంతోషం.. వీటన్నిటికీ నువ్వు తోడుంటేనే అర్థం ఉంటుంది. నీ భార్యగా పిలిపించుకోవడానికి నేను చాలా ఎక్సైటింగ్గా ఉన్నాను' అంటూ రష్మిక తన ఆనందాన్ని పంచుకుంది. ఈ పెళ్లి ఉదయ్పూర్లోని ఐటిసి మెమెంటోస్లో చాలా ప్రైవేట్గా జరిగింది. వీరు తెలుగు మరియు కొడవ పద్ధతుల్లో రెండుసార్లు వివాహం చేసుకున్నారు. విజయ్ ఐవరీ రంగు ధోతీ మరియు ఎరుపు రంగు అంగవస్త్రంలో 'ఉస్తాద్' లా కనిపిస్తే.. రష్మిక సాంప్రదాయకమైన ఎరుపు రంగు పట్టు చీరలో మెరిసిపోయింది.
నెటిజన్లు వీరి జోడీని చూసి 'రాముడు - సీత' లాగా ఉన్నారంటూ కామెంట్స్ చేస్తున్నారు. ముఖ్యంగా విజయ్ గుర్రంపై ఎంట్రీ ఇచ్చిన ఫోటోలు, రష్మిక కళ్ళలో నీళ్లు తిరిగిన ఫోటోలు ఫ్యాన్స్ను కట్టిపడేస్తున్నాయి. సమంత, నాని, వరుణ్ ధావన్, జాన్వీ కపూర్ వంటి స్టార్స్ ఈ జంటకు శుభాకాంక్షలు తెలిపారు. ముఖ్యంగా నాని తన ట్విట్టర్లో 'విజయ్ - రష్మిక.. మీ జీవితం మరింత అందంగా ఉండాలని కోరుకుంటున్నాను' అని విష్ చేశారు. ఇక మార్చి 4న హైదరాబాద్లోని తాజ్ కృష్ణలో సినిమా ఇండస్ట్రీ పెద్దల కోసం గ్రాండ్ రిసెప్షన్ జరగబోతోంది.
