విజయవాడ సాయికృష్ణ లాకప్ డెత్ ఆరోపణల కేసు ఇప్పుడు తెలుగు రాష్ట్రాల్లో తీవ్ర సంచలనంగా మారింది. కృష్ణలంక మాజీ సీఐ నాగరాజును సిట్ అధికారులు అదుపులోకి తీసుకుని గంటల తరబడి విచారించారు. కానీ, ఇక్కడే ఒక మైండ్ బ్లోయింగ్ ట్విస్ట్ వెలుగులోకి వచ్చింది. సిట్ అధికారులు సంధించిన ఏ ఒక్క ప్రశ్నకు కూడా సీఐ నాగరాజు నోరు విప్పలేదు. 'నాకేం తెలియదు' అని ముక్తసరిగా సమాధానం చెప్పి దాటవేశారు. మరి ఒక సర్కిల్ ఇన్స్పెక్టర్ స్థాయి అధికారి సిట్ ముందే అంత ధీమాగా, మౌనంగా ఉండటానికి కారణం ఏంటి? అసలు ఎలాంటి సాక్ష్యాలు లేకుండా టెక్నికల్గా కేసును క్లోజ్ చేశారా? సిట్ అధికారులకు ఇప్పటివరకు గట్టి ఆధారాలు దొరకలేదా? కోర్టులో ఈ కేసు నిలబడుతుందా?\
ఈ కేసులో సిట్ ఎదుర్కొంటున్న మొదటి మరియు అతిపెద్ద టెక్నికల్ సవాలు.. సీసీటీవీ ఫుటేజ్ మాయమవ్వడం. కృష్ణలంక పోలీస్ స్టేషన్లో మే 1 నుంచి జూన్ 1 వరకు జరిగిన రికార్డింగ్స్ ఏవీ అందుబాటులో లేవు. సాయికృష్ణను స్టేషన్కు తీసుకొచ్చిన డిజిటల్ ఆధారాలు లేకుండా డిలీట్ చేశారు. ఇక్కడే సీఐ నాగరాజు ఒక లీగల్ అడ్వాంటేజ్ తీసుకుంటున్నారు. చట్టం ప్రకారం నేరం జరిగిందని నిరూపించడానికి ‘ప్రైమరీ డిజిటల్ ఎవిడెన్స్’ చాలా కీలకం. అయితే, హార్డ్ డిస్క్ నుండి డేటాను డిలీట్ చేసినా, దానిని ఫోరెన్సిక్ ల్యాబ్ ద్వారా రికవర్ చేసే టెక్నాలజీ సిట్ దగ్గర ఉంది. కానీ, ఆ రిపోర్ట్ రావడానికి సమయం పడుతుంది. అప్పటివరకు సిట్ దగ్గర బలమైన డిజిటల్ సాక్ష్యం లేదనే నమ్మకంతోనే నాగరాజు మౌనంగా ఉన్నట్లు తెలుస్తోంది.
రెండో కీలకమైన పాయింట్.. ‘కార్పస్ డెలెక్టి’. అంటే చట్టం ప్రకారం ఒకరిపై హత్య కేసు మోపాలంటే, నేరం జరిగింది అనడానికి డెడ్ బాడీ లేదా బలమైన భౌతిక ఆధారం ఉండాలి. ఈ కేసులో సాయికృష్ణ శవం ఎక్కడ ఉందో ఇప్పటివరకు సిట్ కనిపెట్టలేకపోయింది. గుర్తుతెలియని శవంగా చూపించి ఎక్కడైనా దహనం చేశారా అనే కోణంలో రికార్డులు వెతుకుతున్నారు. డెడ్ బాడీ లేనప్పుడు కేవలం ఆరోపణల ఆధారంగా కోర్టులో హత్య నేరాన్ని నిరూపించడం అంత సులువు కాదు. 'శవమే లేనప్పుడు నేను హత్య చేశానని ఎలా చెబుతారు?' అనే టెక్నికల్ పాయింట్ను డిఫెన్స్ లాయర్లు వాడుకునే అవకాశం ఉంది. అందుకే నాగరాజు అంత నమ్మకంగా సైలెంట్గా ఉంటున్నారనే చర్చ నడుస్తోంది.
మరి సిట్ అధికారులకు అసలు సాక్ష్యాలే దొరకలేదా? నాగరాజు తప్పు చేశాడని చెప్పలేకపోతున్నారా? అంటే.. అలా ఏం లేదు. సిట్ దగ్గర ఒక బలమైన ‘పరిస్థితుల సాక్ష్యం’ ఉంది. మార్కాపురం నుంచి సాయికృష్ణను విజయవాడ టాస్క్ఫోర్స్ పోలీసులు పట్టుకుని కృష్ణలంక పీఎస్కు అప్పగించారు. దానికి సంబంధించిన రాతపూర్వక ‘అక్నాలెడ్జ్మెంట్’ సిట్ స్వాధీనం చేసుకుంది. అంటే సాయికృష్ణ కృష్ణలంక పోలీస్ స్టేషన్లోకి వచ్చాడనే దానికి పక్కా ఆధారం ఉంది. ఒక వ్యక్తి పోలీస్ కస్టడీలోకి వచ్చాక ఏమయ్యాడో సమాధానం చెప్పాల్సిన బాధ్యత ఆ స్టేషన్ హౌస్ ఆఫీసర్ అయిన సీఐ నాగరాజుదే.
చట్టప్రకారం దీనిని 'లాస్ట్ సీన్ థియరీ' అంటారు. దీనికి నాగరాజు సమాధానం చెప్పి తీరాల్సిందే. సిట్ చీఫ్ రవిప్రకాశ్ ఐదు గంటల పాటు ప్రశ్నించినా నాగరాజు నోరు విప్పకపోవడం వెనుక ఒక లీగల్ ప్లాన్ ఉంది. భారత రాజ్యాంగం ప్రకారం ఆర్టికల్ 20(3) కింద ఏ నిందితుడూ తనకి తాను వ్యతిరేకంగా సాక్ష్యం చెప్పుకోవాలని పోలీసులు బలవంతం చేయడానికి వీల్లేదు. పోలీస్ కస్టడీలో నిందితుడు చెప్పే అంగీకార వాంగ్మూలానికి కోర్టులో చట్టబద్ధమైన విలువ ఉండదు. నాగరాజు స్వయంగా పోలీస్ ఆఫీసర్ కాబట్టి ఈ లీగల్ లూప్హోల్స్ ఆయనకు బాగా తెలుసు.
నోరు విప్పి ఏదైనా చెప్తే, దాని ద్వారా సిట్ మరిన్ని ఆధారాలు సేకరిస్తుందని.. అదే మౌనంగా ఉంటే కోర్టు రిమాండ్కు పంపినప్పుడు లాయర్ల ద్వారా బెయిల్ తెచ్చుకోవచ్చనేది ఆయన స్ట్రాటజీలా కనిపిస్తోంది. అయితే సిట్ అధికారులు కూడా తక్కువ వాళ్లేం కాదు. నాగరాజు సహకరించకపోవడంతో ఆయన్ను కోర్టులో హాజరుపరిచి, ఆ తర్వాత ‘సిట్ కస్టడీ’ కింద మరికొన్ని రోజులు విచారించేందుకు అనుమతి కోరనున్నారు. టెక్నికల్గా సాక్ష్యాలను రూపుమాపినందుకు BNS 238 సెక్షన్ కూడా యాడ్ చేశారు. పోలీస్ స్టేషన్ వైర్లెస్ లాగ్లు, ఫోరెన్సిక్ డేటా రికవరీ ద్వారా సిట్ ఈ మిస్టరీని ఛేదించే పనిలో ఉంది. మరి టెక్నికల్ ఆధారాలను మాయం చేసినా.. సిట్ ఈ కేసులో నిజాలను బయటకు తీస్తుందా లేదా అనేది చూడాలి.
