ఆంధ్రప్రదేశ్ రాజధాని అమరావతి వేదికగా ఇప్పుడు సరికొత్త రాజకీయ చర్చ మొదలైంది. గత ఐదేళ్లుగా ఏ అమరావతిని అయితే వైఎస్సార్ కాంగ్రెస్ పార్టీ తీవ్రంగా వ్యతిరేకించిందో, ఏ అమరావతిని అయితే శ్మశానంతో పోల్చారో.. ఇప్పుడు అదే అమరావతి నడిబొడ్డున నిర్మించిన అత్యంత విలాసవంతమైన ఫ్లాట్లలోకి వైసీపీ ఎమ్మెల్యేలు, ఎమ్మెల్సీలు అడుగు పెట్టబోతున్నారా? ముఖ్యమంత్రి నారా చంద్రబాబు నాయుడు తీసుకున్న ఒక సంచలన నిర్ణయం ఇప్పుడు వైఎస్సార్సీపీ అధినేత వైఎస్ జగన్ మోహన్ రెడ్డికి, ఆ పార్టీ ప్రజాప్రతినిధులకు పెద్ద మైండ్ గేమ్లా మారింది. అసలు రాయపూడిలో సిద్ధమైన ఆ విలాసవంతమైన ఇళ్ల కథ ఏంటి? చంద్రబాబు పెట్టిన ముహూర్తం వెనుక ఉన్న వ్యూహం ఏంటి? వైసీపీ నేతలు ఆ ఇళ్లను తీసుకుంటారా లేదా?
అమరావతి పరిధిలోని రాయపూడిలో ప్రజాప్రతినిధుల కోసం గతంలోనే చంద్రబాబు ప్రభుత్వం క్వార్టర్ల నిర్మాణాన్ని ప్రారంభించింది. మధ్యలో ప్రభుత్వం మారడంతో ఆ పనులు నత్తనడకన సాగాయి. అయితే కూటమి ప్రభుత్వం అధికారంలోకి వచ్చిన వెంటనే యుద్ధప్రాతిపదికన పనులు పూర్తి చేయించింది. ఏకంగా 3,500 చదరపు అడుగుల విస్తీర్ణంతో, సకల సౌకర్యాలతో ఈ విలాసవంతమైన ఫ్లాట్లు ఇప్పుడు ముస్తాబయ్యాయి. అధునాతన మౌలిక వసతులు, గ్రీన్ కవర్, అత్యాధునిక సెక్యూరిటీ సిస్టమ్స్ మరియు హై-ఫై క్లబ్హౌస్తో ఈ నివాస సముదాయం అద్భుతంగా రూపుదిద్దుకుంది. రాజధాని ప్రాంతంలో ప్రజాప్రతినిధుల అధికారిక నివాస శకానికి నాంది పలుకుతూ.. ఈ ఫ్లాట్ల తాళాల అప్పగింత కార్యక్రమానికి ఆగస్టు 24న ముఖ్యమంత్రి చంద్రబాబు నాయుడు ముహూర్తం ఖరారు చేశారు.
ఈ వ్యవహారంలో ముఖ్యమంత్రి చంద్రబాబు నాయుడు అత్యంత వ్యూహాత్మకంగా వ్యవహరించారు. సాధారణ పరిపాలనా శాఖ ద్వారా ఎలాంటి రాజకీయ పక్షపాతం లేకుండా, కేవలం నిబంధనలకు అనుగుణంగానే ఈ ఇళ్ల కేటాయింపు ప్రక్రియ పూర్తి చేశారు. అధికార కూటమికి చెందిన ఎమ్మెల్యేలు, ఎమ్మెల్సీలతో పాటు.. ప్రతిపక్ష వైఎస్సార్ కాంగ్రెస్ పార్టీకి చెందిన సభ్యులకు కూడా చట్టబద్ధంగా, అధికారికంగా ఈ విలాసవంతమైన ఫ్లాట్లను కేటాయించారు. ఇక్కడే చంద్రబాబు తన మార్క్ పాలిటిక్స్ చూపించారు. రూల్స్ ప్రకారం ప్రతిపక్ష నేతలకు కూడా ఇళ్లు ఇవ్వడం ద్వారా.. "మేము ప్రజాస్వామ్యబద్ధంగా వెళ్తున్నాం, మరి మీ నిర్ణయం ఏంటి?" అని వైసీపీ ముందే ఒక పెద్ద సవాల్ను ఉంచారు.
ఇప్పుడు అసలు కథ మొదలైంది. గత ఐదేళ్లుగా జగన్ మోహన్ రెడ్డితో పాటు వైసీపీ లీడర్లు అందరూ అమరావతిని తీవ్రంగా విమర్శించారు. మూడు రాజధానుల ముసుగులో అమరావతి గ్రాఫిక్స్ అని, ఇదొక భ్రమ అని ప్రచారం చేశారు. అలాంటిది ఇప్పుడు ప్రభుత్వం చట్టబద్ధంగా కేటాయించిన ఈ నూతన నివాసాలను వైసీపీ ఎమ్మెల్యేలు, ఎమ్మెల్సీలు స్వీకరిస్తారా? అనేది మిలియన్ డాలర్ల ప్రశ్న. ఒకవేళ ఆ ఇళ్లను తీసుకుని, అమరావతిలోనే కాపురం ఉంటే.. "అమరావతి బాగుంది, ఇక్కడే ఉంటాం" అని ఒప్పుకున్నట్లు అవుతుంది. అది రాజకీయం గా వైఎస్సార్సీపీకి పెద్ద మైనస్ అవుతుంది. పోనీ, ఇళ్లు మాకొద్దు అని తిరస్కరిస్తే.. ప్రభుత్వం కల్పించిన అధికారిక సదుపాయాన్ని కాలదన్నుకున్నట్లు అవుతుంది.
విజయవాడ, గుంటూరు వచ్చేటప్పుడు ప్రైవేట్ హోటళ్లలోనో, సొంత ఇళ్లలోనే ఉండాల్సి వస్తుంది. వైసీపీ ప్రజాప్రతినిధులు ఈ ఇళ్లను తీసుకోవాలా వద్దా అనేదానిపై అంతిమ నిర్ణయం పార్టీ అధినేత వైఎస్ జగన్ మోహన్ రెడ్డిదే అనడంలో ఎలాంటి సందేహం లేదు. గతంలో అసెంబ్లీ సమావేశాలకే వెళ్లకూడదని నిర్ణయించుకున్న వైసీపీ.. ఇప్పుడు అమరావతిలో క్వార్టర్లను తీసుకునేందుకు జగన్ గ్రీన్ సిగ్నల్ ఇస్తారా అనేది ఆసక్తికరంగా మారింది.
ఒకవేళ క్యాడర్ ఒత్తిడి మేరకు ఇళ్లు తీసుకునేందుకు ఒప్పుకుంటే.. చంద్రబాబు ప్లాన్ చేసిన అమరావతి బ్రాండ్కు వైసీపీ కూడా సర్టిఫికెట్ ఇచ్చినట్లు అవుతుంది. అందుకే, ఈ ఆగస్టు 24న తాళాల అప్పగింత కార్యక్రమం తర్వాత వైసీపీ నేతలు ఎలాంటి నిర్ణయం తీసుకోబోతున్నారనే దానిపై అటు పొలిటికల్ సర్కిల్స్, ఇటు రాష్ట్ర ప్రజలు ఉత్కంఠగా ఎదురుచూస్తున్నారు.ఏది ఏమైనా, అమరావతి రాయపూడిలో సిద్ధమైన ఈ ప్రజాప్రతినిధుల నివాసాలు ఇప్పుడు ఏపీ పాలిటిక్స్లో సరికొత్త చర్చకు దారితీశాయి. ఒకప్పుడు వద్దన్న రాజధానిలోనే, సకల సౌకర్యాల మధ్య ఉండటానికి వైసీపీ నేతల మనసు ఒప్పుకుంటుందా? జగన్ ఎలాంటి వ్యూహాన్ని అమలు చేయబోతున్నారు? అనేది కొద్ది రోజుల్లోనే తేలిపోనుంది.
