తెలుగు చిత్ర పరిశ్రమలో విలక్షణ దర్శకుడిగా తనకంటూ ఒక ప్రత్యేకమైన ముద్ర వేసుకున్నారు పూరీ జగన్నాథ్. కేవలం సినిమాలతోనే కాకుండా, తన గంభీరమైన ఆలోచనలతో, సమాజం పట్ల తనకున్న దృక్పథంతో 'పూరీ మ్యూజింగ్స్' ద్వారా లక్షలాది మంది అభిమానులను సంపాదించుకున్నారు. కొన్నాళ్ల విరామం తర్వాత మళ్ళీ తన మ్యూజింగ్స్తో మన ముందుకు వచ్చారు పూరీ. ఈసారి ఆయన ఎంచుకున్న అంశం – ‘సెల్ఫ్ మోటివేషన్’. ప్రతి మనిషి జీవితంలో ఏదో ఒక దశలో నిరాశకు లోనవుతుంటాడు. ఆ సమయంలో మనల్ని మనం ఎలా ముందుకు నడిపించుకోవాలి? అసలు మోటివేషన్ అంటే ఏమిటి? అనే విషయాలను పూరీ తనదైన శైలిలో వివరించారు.
పూరీ జగన్నాథ్ చెప్పిన మాటల్లో అతి ముఖ్యమైనది – స్వయం ప్రేరణ. "మనం ఏదైనా పని చేస్తున్నామంటే, అది మన కోసమే చేయాలి. ఎవరో చెప్పారనో, సమాజం ఏమనుకుంటుందో అనో, లేదా ఎవరైనా బలవంతం చేస్తున్నారనో పనులు చేయకూడదు" అని ఆయన స్పష్టం చేశారు.
మన భవిష్యత్తు బాగుండాలన్నా, మనం ఉన్నత స్థానానికి ఎదగాలన్నా.. ఆ బాధ్యత కేవలం మనదే. మన ఎదుగుదల కోసం మనం చేయాల్సిన పనులను కచ్చితంగా చేసి తీరాలి. ఇందులో ఎలాంటి బద్ధకానికి తావుండకూడదు. చాలామంది తమ మూడ్ బాగున్నప్పుడు మాత్రమే పని చేస్తుంటారు. కానీ పూరీ ఇక్కడే ఒక కీలకమైన పాయింట్ చెప్పారు.
మీ మూడ్ సరిగ్గా లేకపోయినా..మీరు వరుస పరాజయాల్లో ఉండి కుంగిపోతున్నా..పరిస్థితులు మీకు అనుకూలంగా లేకపోయినా..
మీరు చేయాల్సిన పనిని మాత్రం ఆపకూడదు. ఎందుకంటే, పని ఆగిపోతే ఫలితం కూడా ఆగిపోతుంది. నిరంతరం శ్రమించడమే విజయానికి మూలసూత్రం.పూరీ జగన్నాథ్ సెల్ఫ్ మోటివేషన్ను రెండు విభాగాలుగా విభజించారు. మొదటిదిఎక్స్టర్నల్ మోటివేషన్. ఇది బయటి వ్యక్తుల నుంచి లేదా పరిస్థితుల నుంచి వచ్చేది.ఎవరైనా మనల్ని పొగిడితే పని చేయడం.రివార్డులు లేదా బహుమతుల కోసం ఆశపడి కష్టపడటం.
ఎవరి ఒత్తిడికో భయపడి బాధ్యతలు నిర్వహించడం.ఉదాహరణకు, ఉదయాన్నే ఎవరో వచ్చి లేపితే తప్ప నిద్ర లేవకపోవడం 'ఎక్స్టర్నల్ మోటివేషన్' కిందికి వస్తుంది. ఇది తాత్కాలికం మాత్రమే.
రెండవది ఇంటర్నల్ మోటివేషన్. ఇది మన అంతరాత్మ నుంచి వచ్చేది. దీన్నే అసలైన 'సెల్ఫ్ మోటివేషన్' అంటారు.మన లక్ష్యాల కోసం మనం పనిచేయడం.మన విలువల కోసం కట్టుబడి ఉండటం.ఎవరో చెప్పాల్సిన అవసరం లేకుండా, మన బాధ్యతను మనం గుర్తించడం.ఉదాహరణకు, ఉదయాన్నే ఎవరి సహాయం లేకుండా, మీ అంతట మీరు నిద్ర లేచి మీ పనుల మీద దృష్టి పెడితే.. అది మీ ఇంటర్నల్ మోటివేషన్. పూరీ జగన్నాథ్ మాటల సారాంశం ఒక్కటే.. నీ జీవితానికి నువ్వే యజమానివి. బయటి ప్రపంచం ఇచ్చే ప్రోత్సాహం ఎప్పుడూ తోడుండదు. కానీ నీలో ఉన్న సంకల్పం నిన్ను నిరంతరం నడిపిస్తుంది. జీవితంలో గెలవాలన్నా, ఓడినా మళ్ళీ నిలబడాలన్నా 'సెల్ఫ్ మోటివేషన్' అనేది ఆయుధం లాంటిది.పూరీ మ్యూజింగ్స్ నుంచి వచ్చిన ఈ 'సెల్ఫ్ మోటివేషన్' పాఠం ఇప్పుడు సోషల్ మీడియాలో వైరల్ అవుతోంది.
