ఆంధ్రప్రదేశ్ రాజకీయం ఇప్పుడు మునుపెన్నడూ లేనంతగా అగ్గి రాజేస్తోంది. డిప్యూటీ సీఎం పవన్ కళ్యాణ్ను గానీ, కూటమి ప్రభుత్వాన్ని గానీ అంత ఈజీగా లైట్ తీసుకోవచ్చు అనుకుంటే పొరపాటేనని తాజా ఘటనలు నిరూపిస్తున్నాయి. సోషల్ మీడియాలోనో, సభల్లోనో నోటికొచ్చినట్టు మాట్లాడితే.. చట్టం ఎంత పవర్ఫుల్గా స్పందిస్తుందో చూపిస్తూ ఏపీ పోలీసులు ఒక గట్టి ఆన్సర్ ఇచ్చారు. అవును, యూట్యూబర్ 'ప్రశ్న' రావణ్ను ఒకసారి కాదు, రెండు సార్లు కాదు.. ఏకంగా వరుసగా ఐదు సార్లు అరెస్ట్ చేసి, చివరికి దేశద్రోహులపై ప్రయోగించే అత్యంత కఠినమైన 'ఉపా' చట్టం కింద బుక్ చేశారు. ఇది విమర్శకులకు ఒక రకంగా గట్టి 'స్లిప్పర్ షాట్' అనే చెప్పాలి. అసలు రావణ్ను పవన్ కళ్యాణ్ ఎందుకు అంత ఈజీగా వదిలిపెట్టలేదు..? ఈ 'ఉపా' చట్టం వెనుక ఉన్న అసలు రహస్యం ఏంటి? దీనివల్ల ఇకపై పవన్ మీద, ఏపీ ప్రభుత్వం మీద విమర్శలు చేసే వాళ్ల సంఖ్య తగ్గుతుందా?
అసలు ఏం జరిగిందంటే.. గత నెల 28న ఏలూరులో జరిగిన జై భీమ్ భారత పార్టీ సభలో ప్రశ్న రావణ్.. సీఎం చంద్రబాబు, డిప్యూటీ సీఎం పవన్ కళ్యాణ్లను టార్గెట్ చేస్తూ తీవ్రమైన అనుచిత వ్యాఖ్యలు చేశారు. దేవుడు నోరిచ్చాడు కదా అని హద్దులు దాటి మాట్లాడటంతో జనసేన నాయకులు రంగంలోకి దిగారు. మొదట జూన్ 30న పిఠాపురం పోలీసులు రావణ్ను హైదరాబాద్లో అరెస్ట్ చేశారు. అక్కడి నుంచి మొదలైంది అసలు సినిమా. కోర్టు ఒక కేసులో బెయిల్ ఇస్తే, పోలీస్ స్టేషన్ బయటకి రాకముందే సర్పవరం పోలీసులు అరెస్ట్ చేశారు. అక్కడ బెయిల్ వస్తే మచిలీపట్నం, ఆ తర్వాత పాయకరావుపేట పోలీసులు.. ఇలా ఒకదాని తర్వాత ఒకటి వరుసగా నాలుగు కేసుల్లో అరెస్ట్ చేశారు. కోర్టులు బెయిల్ ఇస్తున్నా, రావణ్ను వదిలిపెట్టే ప్రసక్తే లేదన్నట్టుగా పోలీసులు ఉచ్చు బిగించారు.
అయితే రావణ్ శనివారం సాయంత్రం నాలుగో కేసులో బెయిల్ పొంది ఇంటికి వెళ్తుండగా.. అనకాపల్లి టోల్ ప్లాజా వద్ద గన్నవరం పోలీసులు మళ్లీ అడ్డుకున్నారు. ఈసారి పోలీసులు పెట్టిన సెక్షన్లు చూసి అందరి మైండ్ బ్లాక్ అయిపోయింది. రావణ్ కేవలం పవన్ కళ్యాణ్ను దూషించడమే కాకుండా.. ఎలూరు సభలో నిషేధిత సిపిఐ మావోయిస్టుల సిద్ధాంతాలను ప్రచారం చేశాడని, సాయుధ తిరుగుబాటును ప్రేరేపించేలా మాట్లాడాడని గన్నవరం పోలీస్ స్టేషన్లో కేసు నమోదైంది. దీనితో అతనిపై మామూలు ఐపీసీ సెక్షన్లు కాదు.. దేశ సార్వభౌమత్వానికి ముప్పు తెచ్చే విధంగా ప్రవర్తించినందుకు ఉపా చట్టం సెక్షన్ 13, 39 కింద నాన్-బెయిలబుల్ కేసు పెట్టారు.
కోర్టు కూడా ఈ తీవ్రతను గమనించి అతనికి 14 రోజుల రిమాండ్ విధించి నెల్లూరు జైలుకు తరలించింది. ఈ దెబ్బతో పవన్ కళ్యాణ్ తనను విమర్శించే వారికి ఎలాంటి చుక్కలు చూపిస్తారో స్పష్టమైన మెసేజ్ వెళ్ళిపోయింది. ఇప్పుడు అందరిలో మెదులుతున్న అతిపెద్ద ప్రశ్న.. ఈ ఉపా చట్టం ప్రయోగం తర్వాత పవన్ కళ్యాణ్ పై గాని, ఏపీ కూటమి ప్రభుత్వం పై గాని విమర్శలు చేసే వాళ్ళ సంఖ్య తగ్గుతుందా? దీనికి సమాధానం.. కచ్చితంగా తగ్గుతుంది! ఎందుకంటే, గతంలో విమర్శలు అంటే కేవలం రాజకీయ పరిధులకే పరిమితం అయ్యేవి. కానీ ఈ మధ్య కాలంలో యూట్యూబ్ లోనో, సోషల్ మీడియా లోనో వ్యూస్ కోసం, పొలిటికల్ మైలేజ్ కోసం హద్దులు దాటి పర్సనల్ ఎటాక్స్ చేయడం ఒక ఫ్యాషన్ అయిపోయింది. దేవుళ్లు, కుటుంబ సభ్యులను లాగుతూ దారుణమైన లాంగ్వేజ్ వాడుతున్నారు.
కానీ, ఎప్పుడైతే 'ఉపా' లాంటి కఠినమైన చట్టాలు రంగంలోకి వచ్చాయో.. బెయిల్ రావడం కూడా అసాధ్యం అని తేలిపోయిందో.. అప్పుడు ఇంట్లో కూర్చుని కీబోర్డ్ వీరుల్లా ప్రతాపం చూపించే వాళ్లకు వెన్నులో వణుకు మొదలవుతుంది. తమ కెరీర్, జీవితం నాశనం అయిపోతుందనే భయంతో విమర్శలు చేసే ముందు వందసార్లు ఆలోచిస్తారు. హద్దు దాటితే పోలీసులు ఏ రేంజ్ లో వెంటాడతారో రావణ్ కేసే నిదర్శనం. అయితే ఈ నాణేనికి మరో వైపు కూడా ఉంది. రావణ్ పై ఉపా చట్టం పెట్టడాన్ని ప్రతిపక్ష వైఎస్సార్సీపీ తీవ్రంగా తప్పుబడుతోంది. పవన్ కళ్యాణ్ ప్రజా సమస్యలను వదిలేసి, కేవలం తనను విమర్శించిన ఒక యూట్యూబర్పై కక్ష సాధింపు చర్యలకు దిగుతున్నారని ఆరోపిస్తోంది.
అటు నటుడు ప్రకాష్ రాజ్, లెఫ్ట్ పార్టీలు, హక్కుల సంఘాలు కూడా ఈ అరెస్టులను తీవ్రంగా వ్యతిరేకిస్తున్నాయి. కోర్టులు బెయిల్ ఇస్తున్నా మళ్లీ మళ్లీ అరెస్ట్ చేయడం భావప్రకటన స్వేచ్ఛను హరించడమేనని వాదిస్తున్నారు. రాజకీయ విమర్శలను రాజకీయంగానే ఎదుర్కోవాలి కానీ, ఇలాంటి చట్టాలను దుర్వినియోగం చేయకూడదని వారు డిమాండ్ చేస్తున్నారు. ఏది ఏమైనా, ప్రభుత్వం మాత్రం శాంతిభద్రతలకు విఘాతం కలిగిస్తే ఎంతటి వారినైనా వదిలేది లేదనే సిగ్నల్ ఇచ్చేసింది. చివరగా చెప్పాలంటే.. ప్రశ్న రావణ్ ఎపిసోడ్తో ఏపీ పాలిటిక్స్ నెక్ట్స్ లెవెల్కి వెళ్ళిపోయాయి. పవన్ కళ్యాణ్ను అంత ఈజీగా తక్కువ అంచనా వేయలేమని విమర్శకులకు స్పష్టంగా అర్థమైంది. మరి ఈ కఠినమైన చర్యల తర్వాత సోషల్ మీడియాలో ట్రోలింగ్, అనుచిత విమర్శలు తగ్గుతాయా? లేక ఇది మరింత పొలిటికల్ వార్ కి దారితీస్తుందా? అనేది చూడాలి.
