నటుడు అడివి శేష్ అంటేనే ఒక బ్రాండ్. వైవిధ్యమైన కథలను ఎంచుకుంటూ టాలీవుడ్లో తనకంటూ ఒక ప్రత్యేకమైన గుర్తింపు తెచ్చుకున్న శేష్, ఇప్పుడు తన లేటెస్ట్ మూవీ 'డెకాయిట్: ఒక ప్రేమ కథ'తో బాక్సాఫీస్ వద్ద సరికొత్త చరిత్ర సృష్టించారు. మొదటి రోజే ఊహించని రీతిలో భారీ వసూళ్లను రాబట్టి ట్రేడ్ వర్గాలను సైతం ఆశ్చర్యపరిచారు. డెకాయిట్' చిత్రం మొదటి రోజే ప్రపంచవ్యాప్తంగా 15 కోట్లకు పైగా గ్రాస్ వసూళ్లను సాధించింది. అడివి శేష్ కెరీర్లోనే ఇది 'హైయెస్ట్ ఓపెనింగ్ డే' వసూళ్లు కావడం విశేషం. ఇదివరకు ఆయన నటించిన 'మేజర్', 'హిట్-2' చిత్రాలు మంచి ఓపెనింగ్స్ సాధించినప్పటికీ, 'డెకాయిట్' ఆ రికార్డులన్నింటినీ తుడిచిపెట్టేసింది.
సినిమా విడుదలకు ముందు ఉన్న హైప్, టీజర్ మరియు సాంగ్స్ ఇచ్చిన బజ్ బాక్సాఫీస్ వసూళ్లపై స్పష్టంగా కనిపిస్తోంది. ప్రేక్షకుల నుండి వస్తున్న అద్భుతమైన స్పందనతో ఈ సినిమాను 'ఆడియన్స్ బ్లాక్ బస్టర్'గా చిత్ర యూనిట్ అభివర్ణిస్తోంది. కేవలం తెలుగు రాష్ట్రాల్లోనే కాకుండా, ఓవర్సీస్ మార్కెట్లో కూడా శేష్ స్టామినా మరోసారి నిరూపితమైంది. డెకాయిట్' కేవలం ఒక యాక్షన్ సినిమా మాత్రమే కాదు, ఇందులో బలమైన ఎమోషన్స్ ఉన్న 'ఒక ప్రేమ కథ' కూడా ఉందని టైటిల్లోనే స్పష్టమవుతోంది.
ఈ చిత్రంలో శేష్ రఫ్ అండ్ టఫ్ లుక్లో కనిపిస్తూనే, తన నటనతో ప్రేక్షకులను మెప్పించారు. షానీల్ డియో ఈ చిత్రాన్ని అద్భుతంగా తెరకెక్కించారు. ఆయన మేకింగ్ స్టైల్ హాలీవుడ్ ప్రమాణాలకు దగ్గరగా ఉందనే ప్రశంసలు దక్కుతున్నాయి. ఎస్.ఎస్ క్రియేషన్స్ మరియు సునీల్ నారంగ్ సంయుక్తంగా ఈ భారీ ప్రాజెక్ట్ను నిర్మించారు. సుప్రియ యార్లగడ్డ నిర్మాణ విలువలు సినిమాకు అదనపు బలాన్ని చేకూర్చాయి. మొదటి రోజు 15 కోట్ల గ్రాస్ అంటే ఇది కేవలం ఆరంభం మాత్రమే. వీకెండ్ ముగిసే సరికి ఈ వసూళ్లు రెట్టింపు అయ్యే అవకాశం ఉందని ట్రేడ్ అనలిస్టులు అంచనా వేస్తున్నారు. కంటెంట్ ఉన్న సినిమాను ప్రేక్షకులు ఎప్పుడూ ఆదరిస్తారని 'డెకాయిట్' మరోసారి నిరూపించింది. శేష్ తన కెరీర్లో మరో భారీ విజయాన్ని ఖాతాలో వేసుకున్నట్టే కనిపిస్తోంది.
