బాలీవుడ్ స్టార్ హీరో ఆమిర్ ఖాన్ ఎప్పుడూ తన సినిమాలతోనే కాకుండా వ్యక్తిగత జీవితంతోనూ వార్తల్లో నిలుస్తూ ఉంటారు. ఇటీవలే ఆయన గౌరీ స్పైట్ను వివాహం చేసుకున్న విషయం తెలిసిందే. జూలై 5న ముంబైలో అత్యంత సాదాసీదాగా, చాలా సింపుల్గా వీరి వివాహం జరిగింది. అయితే ఈ పెళ్లి జరిగినప్పటి నుంచి సోషల్ మీడియాలో ఆమిర్ ఖాన్ను టార్గెట్ చేస్తూ విపరీతమైన ట్రోలింగ్ నడుస్తోంది. కొందరైతే ఏకంగా ఆయన్ను 'లవ్ జిహాద్ బ్రాండ్ అంబాసిడర్' అంటూ విమర్శలు గుప్పించడం ప్రారంభించారు. తాజాగా ఈ వివాదంపై ఆమిర్ ఖాన్ తీవ్రంగా స్పందిస్తూ, ట్రోలర్ల నోళ్లు మూయించేలా పూర్తి క్లారిటీ ఇచ్చారు.తనపై వస్తున్న ఈ లవ్ జిహాద్ కామెంట్లలో ఎలాంటి నిజం లేదని ఆమిర్ ఖాన్ పూర్తిగా కొట్టిపారేశారు.
తన కుటుంబంలో ఎప్పటి నుంచో భిన్న మతాల వివాహాలు జరుగుతున్నాయని, తమది చాలా ఓపెన్ మైండ్ ఉన్న సమ్మేళిత కుటుంబమని చెప్పారు. తన ఇద్దరు సోదరిమణులు హిందువులను పెళ్లి చేసుకున్నారని, అలాగే తన కుమార్తె కూడా ఒక హిందూ అబ్బాయినే వివాహం చేసుకుందని గుర్తు చేశారు. దీనితో పాటు తన కజిన్ మన్సూర్ ఒక క్రిస్టియన్ మహిళను పెళ్లాడారని వివరిస్తూ.. తమ కుటుంబంలో మతాల పరంగా ఎలాంటి బేధాలు లేవని స్పష్టం చేశారు.సాధారణంగా ఇలాంటి అంతర్-మత వివాహాలు జరిగినప్పుడు మత మార్పిడులు జరుగుతాయనే ఆరోపణలు వస్తుంటాయి.
కానీ తన జీవితంలో జరిగిన పెళ్లిళ్లలో ఎప్పుడూ మతం మార్పిడి అనేదే జరగలేదని ఆమిర్ ఖాన్ స్పష్టం చేశారు. ఇప్పుడు తాను చేసుకున్న గౌరీ స్పైట్ కానీ, గతంలో వివాహం చేసుకున్న కిరణ్ రావు, రీనా దత్తా గానీ.. వీరెవరూ తన కోసం మతం మార్చుకోలేదని తెలిపారు. తమవన్నీ చట్టబద్ధంగా జరిగిన రిజిస్టర్ పెళ్లిళ్లు అని ఆయన వివరించారు.పైగా తన మూడో భార్య గౌరీ స్పైట్ అసలు హిందువు కూడా కాదని, ఆమె ఒక క్రిస్టియన్ అని ఆమిర్ క్లారిటీ ఇచ్చారు. అది కూడా ఆమె ప్రాక్టీసింగ్ క్రిస్టియన్ కాదని చెప్పారు. రోజులు గడుస్తున్న కొద్దీ కొందరి ప్రవర్తన చూస్తుంటే జీవితం మరింత వింతగా, కామెడీగా మారుతోందంటూ ఆమిర్ ఖాన్ ఈ వివాదంపై ఫైర్ అయ్యారు. ఇదిలా ఉంటే, ఆమిర్ ఖాన్ మరియు గౌరీ స్పైట్ పెళ్లికి సంబంధించిన ఫస్ట్ డ్యాన్స్ వీడియో ప్రస్తుతం ఇంటర్నెట్లో విపరీతంగా వైరల్ అవుతోంది.
