మెగా కాంపౌండ్ నుంచి మరో వారసుడు వస్తున్నాడంటే ఆ హడావిడి మామూలుగా ఉండదు. అందులోనూ పవర్ స్టార్ పవన్ కళ్యాణ్ తనయుడు అకిరా నందన్ వెండితెర ఎంట్రీ అంటే అంచనాలు ఆకాశంలో ఉంటాయి. అకిరా ఎప్పుడు సినిమాల్లోకి వస్తాడా అని వేయి కళ్ళతో ఎదురుచూస్తున్న అభిమానులకు ఇప్పుడు వినిపిస్తున్న ఓ వార్త ఆశ్చర్యాన్ని కలిగిస్తోంది. ఇండస్ట్రీలో ఎంతమంది దర్శకులు పవన్ కళ్యాణ్ కొడుకుతో సినిమా చేయడానికి రెడీగా ఉంటే.. సెన్సిబుల్ డైరెక్టర్ శేఖర్ కమ్ముల దర్శకత్వంలో అకిరా డెబ్యూ ఉండబోతోందనే టాక్ ఇప్పుడు ఇండస్ట్రీలో హాట్ టాపిక్ గా మారింది. ఎప్పుడూ లీడర్, ఫిదా, లవ్ స్టోరీ వంటి క్లాస్ సినిమాలు తీసే కమ్ముల చేతిలో అకిరా పడటం అనేది నిజంగా అనూహ్యమైన పరిణామం. అయితే మెగా అభిమానులకు ఇక్కడే ఓ చిన్న గందరగోళం ఉంది.
పవన్ కళ్యాణ్ అంటేనే మాస్, మేనరిజం, హై వోల్టేజ్ డైలాగ్స్. అకిరా నుంచి కూడా ఫ్యాన్స్ అచ్చం అలాంటి మాస్ లాంచ్ నే ఆశిస్తారు. కానీ శేఖర్ కమ్ముల స్టైల్ దీనికి పూర్తి విరుద్ధం. ఆయన కథల్లో హీరోలు పక్కింటి కుర్రాడిలా, చాలా సాఫ్ట్ గా ఉంటారు. భారీ యాక్షన్ సీక్వెన్స్ లు, గూస్ బంప్స్ తెప్పించే ఎలివేషన్స్ కమ్ముల సినిమాల్లో చాలా అరుదు. మరి అకిరాను మొదటి సినిమాతోనే ఇలాంటి క్లాస్ టచ్ తో పరిచయం చేస్తే, పూనకాలు కోరుకునే పవర్ స్టార్ అభిమానులు ఎంతవరకు రిసీవ్ చేసుకుంటారన్నది పెద్ద ప్రశ్నగానే మిగిలింది.
దీనికి తోడు, గతంలో పవన్ కళ్యాణ్ రాజకీయాలపై శేఖర్ కమ్ముల చేసిన వ్యాఖ్యలు ఇప్పుడు మళ్ళీ తెరపైకి వస్తున్నాయి.
జనసేనాని పొలిటికల్ స్టాండ్ పై కమ్ముల చేసిన విమర్శలు అప్పట్లో పెద్ద దుమారమే రేపాయి. రాజకీయాలు వేరు, సినిమాలు వేరు అని సరిపెట్టుకున్నా.. ఆ వ్యాఖ్యల తాలూకు ప్రభావం ఈ కాంబినేషన్ పై పడే అవకాశం లేకపోలేదు. ఒకవేళ ఈ ప్రాజెక్ట్ ఓకే అయితే ఇద్దరూ తమ పాత అభిప్రాయాలను పక్కన పెట్టి, కేవలం సినిమా కోసమే కలుస్తున్నారని అర్థం చేసుకోవాలి. ఇది ఒక రకంగా మెచ్యూర్డ్ స్టెప్ అయినా, ఫ్యాన్స్ ఎమోషన్స్ ని బ్యాలెన్స్ చేయడం కత్తి మీద సాము లాంటిదే. మరో కోణంలో చూస్తే, ఇది అకిరా కెరీర్ కు మంచి పునాది అయ్యే అవకాశం కూడా ఉంది. మొదటి సినిమాతోనే మాస్ హీరో అనే ముద్ర వేసుకోకుండా, నటుడిగా తనను తాను నిరూపించుకోవడానికి కమ్ముల సినిమా బెస్ట్ ఆప్షన్.
గతంలో వరుణ్ తేజ్ కు ఫిదా రూపంలో కమ్ముల ఎలా అయితే మర్చిపోలేని హిట్ ఇచ్చారో.. అకిరాను కూడా అలాగే ప్రెజెంట్ చేసే ఛాన్స్ ఉంది. అకిరాలో ఉన్న స్క్రీన్ ప్రెజెన్స్ కి, కమ్ముల తీసే ఎమోషనల్ కంటెంట్ తోడైతే క్లాస్ ఆడియన్స్ కు అకిరా దగ్గరయ్యే అవకాశం మెండుగా ఉంటుంది. మొత్తానికి ఈ వార్తలో ఎంత నిజముందో తెలియాలంటే అధికారిక ప్రకటన వచ్చే వరకు ఆగాల్సిందే. ఒకవేళ ఇదే నిజమైతే, పవన్ కళ్యాణ్ కుమారుడిని శేఖర్ కమ్ముల ఎలా హ్యాండిల్ చేస్తాడు? పొలిటికల్ కాంట్రవర్సీలను దాటి సినిమాను ఎలా నిలబెడతాడు? అనేవి ఆసక్తికరమైన అంశాలు. హై వోల్టేజ్ ఎంట్రీ లేకపోయినా, స్ట్రాంగ్ కంటెంట్ తో వస్తే మాత్రం అకిరా నందన్ డెబ్యూ టాలీవుడ్ హిస్టరీలో ఓ స్పెషల్ మెమరీగా మిగిలిపోవడం ఖాయం.
