భారతదేశ రాజకీయ ముఖచిత్రాన్ని మార్చే సరికొత్త ప్లాన్ ఒకటి తెరపైకి వచ్చిందా? ఒకవైపు సామాజిక మాధ్యమాలు, డిజిటల్ విప్లవంతో దూసుకుపోయే నేటి తరం జెన్ జీ యువత.. మరోవైపు పొలాల్లో చెమటోడ్చే దేశానికి వెన్నెముక లాంటి రైతన్నలు! పూర్తిగా భిన్నమైన ఆలోచనలు, భిన్నమైన జీవనశైలి కలిగిన ఈ రెండు శక్తులు ఇప్పుడు ఒకే వేదికపైకి రాబోతున్నాయా? దేశ రాజధాని వేదికగా మోదీ ప్రభుత్వానికి వ్యతిరేకంగా ఒక భారీ ఉమ్మడి పోరాటానికి ఇరు వర్గాలు వ్యూహాలు రచిస్తున్నాయా? అసలు ఈ వింత కూటమి వెనుక ఉన్న వ్యూహం ఏంటి? ఈ అలియన్స్ కేంద్ర ప్రభుత్వానికి ఎలాంటి సవాళ్లు విసరబోతోంది?
ఇటీవల దేశ రాజధానిలో జరిగిన ఒక పరిణామం ఇప్పుడు దేశవ్యాప్తంగా చర్చనీయాంశంగా మారింది. పేపర్ లీక్ నిరసనలతో అప్పటి విద్యాశాఖ మంత్రి ధర్మేంద్ర ప్రధాన్ రాజీనామాకు కారణమైన విద్యార్థి సంఘం 'కాక్రోచ్ జనతా పార్టీ 'ప్రతినిధి అశుతోష్ రాంకా.. భారతీయ కిసాన్ యూనియన్ అధ్యక్షుడు రాకేష్ తికాయత్తో ప్రత్యేకంగా సమావేశమయ్యారు. ఈ భేటీలోనే ప్రభుత్వానికి వ్యతిరేకంగా "నలువైపులా వ్యూహాత్మక ఒత్తిడి" తీసుకురావాలనే ప్రణాళికలపై చర్చలు జరిగాయి. జంతర్ మంతర్ నిరసనల్లో పాల్గొన్న విద్యార్థులపై ఎలాంటి చట్టపరమైన చర్యలు తీసుకోకూడదని, బీహార్, రాజస్థాన్, పశ్చిమ బెంగాల్లలో నమోదైన ఎఫ్ఐఆర్లను ఉపసంహరించుకోవాలనే డిమాండ్కు రైతుల మద్దతును సిజెపి కోరింది.
విద్యార్థులు, యువత మరియు దేశంలోని రైతులు కలిసి పనిచేస్తే ప్రభుత్వానికి సరికొత్త సవాలు తప్పదని ఈ సందర్భంగా వారు పేర్కొన్నారు. ఈ సమావేశం కేవలం సాధారణంగా జరిగింది కాదు.. ఎందుకంటే ప్రస్తుతం దేశంలో రైతులు మళ్లీ తమ నిరసన గళాన్ని విప్పుతున్నారు. మధ్యప్రదేశ్లో పండించిన పెసరపంటను 100% ప్రభుత్వం మద్దతు ధరతో కొనుగోలు చేయాలంటూ సంయుక్త కిసాన్ మోర్చా ఆధ్వర్యంలో 2,000 మందికి పైగా రైతులు నిత్యావసరాలతో భోపాల్ వైపు మార్చ్ చేపట్టారు. మరోవైపు, అమెరికా-భారత్ ద్వైపాక్షిక వాణిజ్య ఒప్పందం వల్ల భారత వ్యవసాయ రంగానికి నష్టం వాటిల్లుతుందంటూ పంజాబ్, హర్యానా, హిమాచల్ ప్రదేశ్ రైతులు 'దేశ్ బచావో ఆందోళన్' బ్యానర్ కింద శంభు బోర్డర్ వద్ద పెద్ద ఎత్తున నిరసనలు తెలిపారు.
కేంద్ర వ్యవసాయ శాఖ మంత్రి శివరాజ్ సింగ్ చౌహాన్తో చర్చలు జరిపే హామీ లభించడంతో తాత్కాలికంగా వెనక్కి తగ్గారు. అంటే, ఇటు విద్యార్థుల్లోనూ, అటు రైతుల్లోనూ అసంతృప్తి రాజుకుంటోందనేది స్పష్టమవుతోంది. అయితే ఇక్కడే రాజకీయ విశ్లేషకులు ఒక ఆసక్తికరమైన ప్రశ్నను లేవనెత్తుతున్నారు. అసలు నగరాల్లో ఉంటూ, డిజిటల్ ప్రపంచంలో బతికే 'జెన్ జీ' యువతకు.. గ్రామీణ ప్రాంతాల్లో ఉండే రైతాంగానికి అస్సలు పొంతన ఉందా? ఇరు వర్గాల వయసు, భాష, జీవనశైలి, ఆలోచనా విధానం, మరియు ప్రయోజనాలు పూర్తిగా భిన్నమైనవి. 2021లో మోదీ ప్రభుత్వం మూడు వివాదాస్పద వ్యవసాయ చట్టాలను ఉపసంహరించుకునేలా రైతులు సుదీర్ఘ పోరాటం చేశారు.
అలాగే ఇటీవలే జంతర్ మంతర్ వద్ద విద్యార్థులు ప్రభుత్వానికి మోకరిల్లేలా చేశారు. కానీ, ఈ రెండు వర్గాలు కలిసి ఒకే వేదికపై నడవడం ఎంతవరకు సాధ్యం? క్షేత్రస్థాయిలో ఈ రెండు భిన్న ధృవాలు ఎలా కలుస్తాయి అనే సందేహాలు వ్యక్తమవుతున్నాయి. అయితే విశ్లేషకులు చెబుతున్న దాని ప్రకారం.. ఈ రెండు వర్గాలను కలిపే ఒక బలమైన ఉమ్మడి సమస్య ఉంది. అదే.. దేశంలో పెరుగుతున్న నిరుద్యోగం మరియు లోపభూయిష్టమైన పరీక్షల విధానం. ఈ రోజు పొలాల్లో కష్టపడే ప్రతి రైతు తన పిల్లలను బాగా చదివించి, మంచి ఉద్యోగాల్లో చూడాలని ఆశపడుతున్నాడు. కానీ, పేపర్ లీకేజీలు, పరీక్షల రద్దు, నిరుద్యోగం వల్ల ఆ రైతు బిడ్డల భవిష్యత్తు అంధకారంలో పడుతోంది.
యువతలో ఉన్న ఈ ఆవేదన, రైతుల్లో ఉన్న అసంతృప్తి కలిసి.. భవిష్యత్తులో ఉపాధి అవకాశాల కోసం ఒకే పెద్ద ఉద్యమంగా మారే అవకాశాలను కొట్టిపారేయలేం. ఈ ఉమ్మడి లక్ష్యమే భిన్న భావాలున్న ఈ రెండు ప్రెజర్ గ్రూపులను ఒకే తాటిపైకి తెచ్చేందుకు దోహదపడవచ్చు. దేశంలో రాబోయే రోజుల్లో జెన్ జీ యువత, రైతుల కూటమి ఎలాంటి రాజకీయ ప్రకంపనలు సృష్టించబోతోందో. మరి ఈ రెండు వర్గాలు కలిసి ఉమ్మడిగా పోరాటం చేస్తే కేంద్ర ప్రభుత్వంపై ఎలాంటి ప్రభావం పడుతుంది? అనేది చూడాలి.
