ఎన్టీఆర్ కొత్త సినిమాకు సంబంధించి నిర్మాత నాగవంశీ విడుదల చేసిన పోస్టర్లోని "ఉత్తరాదిలో జన్మించాడు" అనే పదాలపై తమిళనాడులో తీవ్ర అభ్యంతరాలు వ్యక్తమవుతున్నాయి. తమిళులు తమ ఆరాధ్య దైవంగా భావించే మురుగన్ను ఉత్తర భారతదేశానికి ముడిపెట్టడంపై సోషల్ మీడియాలో చర్చ మొదలైంది.
నామ్ తమిళర్ కట్చి' అధినేత సీమాన్ స్పందిస్తూ, మురుగన్ను ఉత్తరాది దేవుడిగా చూపిస్తే తమిళులు అంగీకరించరని, ఇది వారి విశ్వాసాలను దెబ్బతీసేలా ఉంటే తీవ్ర వ్యతిరేకత ఎదుర్కోవాల్సి వస్తుందని హెచ్చరించారు. మరోవైపు, ద్రవిడ దేశం పార్టీ అధ్యక్షుడు కృష్ణారావు ఈ వ్యాఖ్యలను ఖండిస్తూ, మురుగన్ కేవలం తమిళనాడుకే పరిమితం కాదని, దేశవ్యాప్తంగా వివిధ పేర్లతో పూజలందుకుంటున్నారని పేర్కొన్నారు.
పోస్టర్లో త్రిశూలం, జన్యుక్రమాన్ని పోలిన ఆకారం, యుద్ధభూమి దృశ్యాలు మరియు భగవద్గీతలోని సంస్కృత శ్లోకం కనిపిస్తున్నాయి. దీంతో ఈ సినిమా మహాభారత నేపథ్యం లేదా ధర్మం, పునర్జన్మ వంటి అంశాలతో సాగే కథ కావచ్చని అభిమానులు ఊహిస్తున్నారు. ఈ వివాదంపై హీరో ఎన్టీఆర్, దర్శకుడు త్రివిక్రమ్ లేదా చిత్ర నిర్మాతలు ఇప్పటివరకు ఎలాంటి అధికారిక స్పష్టత ఇవ్వలేదు.
