తెలుగు చిత్ర పరిశ్రమలో హీరోయిన్ల సందడి ఎప్పుడూ కొత్తగానే ఉంటుంది. అయితే కొందరు ముద్దుగుమ్మలు ఒకానొక సమయంలో వరుస సినిమాలతో అలరించి, ఆ తర్వాత ఇతర భాషల వైపు దృష్టి మళ్ళిస్తుంటారు. ఇప్పుడు మళ్ళీ టాలీవుడ్ బాక్సాఫీస్ వద్ద తమ సత్తా చాటడానికి ఇద్దరు స్టార్ హీరోయిన్లు సిద్ధమయ్యారు. వారే కీర్తి సురేష్ మరియు కృతి శెట్టి. గత కొంతకాలంగా తెలుగు తెరపై కనిపించని ఈ భామలు, ఇప్పుడు ఒకేసారి అదిరిపోయే ప్రాజెక్టులతో రీ-ఎంట్రీ ఇస్తున్నారు. కీర్తి సురేష్ పేరు వినగానే మనకు ముందుగా గుర్తొచ్చేది 'మహానటి'. ఆ సినిమాతో నేషనల్ అవార్డు అందుకున్న కీర్తి, ఆ తర్వాత తెలుగులో వరుస అవకాశాలు అందుకుంది. అయితే, 2023లో చిరంజీవి సరసన నటించిన 'భోళా శంకర్' తర్వాత ఆమె నేరుగా తెలుగు సినిమాలో కనిపించలేదు.
ఈ మధ్య కాలంలో ఆమె ఎక్కువగా తమిళం మరియు హిందీ ప్రాజెక్టులకే పరిమితమైపోయింది. దాదాపు మూడేళ్ల విరామం తర్వాత, కీర్తి సురేష్ ఇప్పుడు టాలీవుడ్లో తన జోరు పెంచబోతోంది. ప్రస్తుతం ఆమె విజయ్ దేవరకొండ సరసన 'రౌడీ జనార్ధన్' అనే పీరియాడిక్ రూరల్ యాక్షన్ డ్రామాలో నటిస్తోంది. రవికిరణ్ కోలా దర్శకత్వంలో రూపొందుతున్న ఈ చిత్రం ఇప్పటికే షూటింగ్ దశలో ఉంది. ఈ ఏడాది డిసెంబర్లోనే ఈ సినిమా ప్రేక్షకుల ముందుకు రానుంది.అంతేకాకుండా, క్రేజీ డైరెక్టర్ అనిల్ రావిపూడి దర్శకత్వంలో తెరకెక్కుతున్న మల్టీస్టారర్ చిత్రంలో కీర్తి ఒక కీలక పాత్ర పోషిస్తోంది. ఇందులో సీనియర్ హీరో వెంకటేష్ సరసన కీర్తి తొలిసారి జోడీ కడుతుండటం విశేషం. ఈ కాంబినేషన్ మీద ఇప్పటికే ఇండస్ట్రీలో భారీ అంచనాలు ఉన్నాయి. వచ్చే ఏడాది సంక్రాంతి కానుకగా ఈ చిత్రాన్ని విడుదల చేసేందుకు ప్లాన్ చేస్తున్నారు.
ఇక, 'ఉప్పెన' సినిమాతో ఓవర్ నైట్ స్టార్ అయిపోయిన కృతి శెట్టి, ఆ తర్వాత వరుసగా శ్యామ్ సింగరాయ్, బంగార్రాజు వంటి హిట్లను తన ఖాతాలో వేసుకుంది. అయితే, గత రెండేళ్లుగా ఈ భామకు తెలుగులో సరైన విజయం దక్కలేదు. 'మనమే' సినిమా తర్వాత ఆమె రూటు మార్చి మలయాళ, తమిళ చిత్రసీమల వైపు దృష్టి సారించింది. దీంతో తెలుగు ప్రేక్షకులు కృతిని మిస్ అవుతున్నారు అనుకుంటున్న తరుణంలో ఆమె మళ్ళీ రీ-ఎంట్రీకి సిద్ధమైంది. అనిల్ రావిపూడి డైరెక్షన్లో వస్తున్న వెంకటేష్ - కళ్యాణ్ రామ్ మల్టీస్టారర్ సినిమాతోనే కృతి శెట్టి కూడా తెలుగులోకి తిరిగి రాబోతోంది. ఈ చిత్రంలో ఆమె కళ్యాణ్ రామ్కు జోడీగా నటించనుంది.
జూలై నుంచి ఈ సినిమా రెగ్యులర్ షూటింగ్ ప్రారంభం కానుంది. ఒకే సినిమాలో ఇద్దరు క్రేజీ హీరోయిన్లు నటిస్తుండటంతో ఈ ప్రాజెక్ట్ టాలీవుడ్ హాట్ టాపిక్ అయింది. సంక్రాంతి సినిమాలకు అనిల్ రావిపూడి ఒక స్పెషల్ బ్రాండ్. ఆయన సినిమాలో కామెడీ, ఎమోషన్స్ సమపాళ్లలో ఉంటాయి. ఇప్పుడు వెంకటేష్ - కళ్యాణ్ రామ్ వంటి ఇద్దరు మాస్ & క్లాస్ హీరోలను కలపడమే కాకుండా.. కీర్తి సురేష్, కృతి శెట్టి వంటి స్టార్ హీరోయిన్లను తీసుకోవడం సినిమాపై హైప్ను రెట్టింపు చేసింది. మొత్తానికి, తమ సెకండ్ ఇన్నింగ్స్లో ఈ భామలు ఎలాంటి మ్యాజిక్ చేస్తారో చూడాలి. కీర్తి సురేష్ తన నటనతో, కృతి శెట్టి తన గ్లామర్తో మళ్ళీ తెలుగు ఆడియన్స్ను కట్టిపడేస్తారా? సంక్రాంతి బరిలో అనిల్ రావిపూడి వీరిద్దరినీ ఎలా ప్రెజెంట్ చేస్తారు? అనేది తెలియాలంటే ఒక్కో అప్డేట్ కోసం ఎదురు చూడాల్సిందే.
