తమిళనాడు రాజకీయాలు ఇప్పుడు ఒక కీలక మలుపులో ఉన్నాయి. ఇటీవల జరిగిన అసెంబ్లీ ఎన్నికల ఫలితాలు రాష్ట్రంలో మునుపెన్నడూ లేని ఉత్కంఠను రేకెత్తిస్తున్నాయి. ఏ ఒక్క పార్టీకి స్పష్టమైన మెజార్టీ రాకపోవడంతో, తదుపరి ప్రభుత్వం ఎవరిది? గవర్నర్ నిర్ణయం ఎలా ఉండబోతోంది? అనే అంశాలపై సర్వత్రా ఆసక్తి నెలకొంది. ఈ క్రమంలో మక్కల్ నీది మయ్యం అధినేత కమల్ హాసన్ చేసిన వ్యాఖ్యలు ఇప్పుడు రాజకీయ వర్గాల్లో హాట్ టాపిక్ గా మారాయి. ఎన్నికల్లో ఏకంగా 108 స్థానాలు గెలుచుకుని అతిపెద్ద పార్టీగా అవతరించిన తమిళగ వెట్రి కజగం అధినేత విజయ్ను వెంటనే ప్రభుత్వ ఏర్పాటుకు ఆహ్వానించాలని కమల్ హాసన్ డిమాండ్ చేశారు.
ప్రజాస్వామ్యంలో ప్రజల తీర్పు అత్యున్నతమైనదని, అత్యధిక సీట్లు సాధించిన పార్టీకి మొదటి అవకాశం ఇవ్వకపోవడం తమిళనాడు ప్రజల తీర్పును అవమానించడమే అవుతుందని ఆయన అభిప్రాయపడ్డారు. ఎన్నికైన 233 మంది ఎమ్మెల్యేలు ఇంకా ప్రమాణ స్వీకారం చేయకుండా ఎదురుచూడటం రాష్ట్రానికి, ప్రజాస్వామ్యానికి ఏమాత్రం మంచిది కాదని ఆయన ఆవేదన వ్యక్తం చేశారు. ప్రభుత్వ ఏర్పాటులో జరుగుతున్న ఆలస్యం పరిపాలనాపరమైన స్తంభనకు దారితీస్తుందని హెచ్చరించారు. ప్రభుత్వ ఏర్పాటు విషయంలో తలెత్తే న్యాయపరమైన చిక్కులు, గవర్నర్ పాత్ర గురించి మాట్లాడుతూ కమల్ హాసన్ ప్రఖ్యాత ‘ఎస్.ఆర్. బొమ్మై’ కేసును ప్రస్తావించారు.
ఏ పార్టీకీ స్పష్టమైన మెజార్టీ లేనప్పుడు, బలపరీక్ష అనేది రాజ్భవన్లో కాకుండా అసెంబ్లీలో మాత్రమే జరగాలని సుప్రీంకోర్టు స్పష్టంగా చెప్పిన విషయాన్ని ఆయన గుర్తుచేశారు. తాను ఒక పార్టీ నాయకుడిగా కాకుండా, రాజ్యాంగంపై అవగాహన ఉన్న భారతీయ పౌరుడిగా, ఒక విధానపరమైన గొంతుకగా ఈ విషయాలు మాట్లాడుతున్నానని కమల్ స్పష్టం చేశారు. తమిళనాడులో ప్రస్తుతం నెలకొన్న అస్థిరతకు తెరపడాలంటే గవర్నర్ త్వరితగతిన నిర్ణయం తీసుకోవాల్సి ఉంది. తమిళనాడు అసెంబ్లీలో బలపరీక్ష ఎప్పుడు జరుగుతుంది? గవర్నర్ విజయ్ ను ఆహ్వానిస్తారా? లేక ఇతర సమీకరణాలు తెరపైకి వస్తాయా? అనేది వేచి చూడాలి. ఏదేమైనా, కమల్ హాసన్ చేసిన ఈ తాజా వ్యాఖ్యలు అటు రాజకీయ వర్గాల్లోనూ, ఇటు సోషల్ మీడియాలోనూ పెద్ద ఎత్తున చర్చకు దారితీస్తున్నాయి.
