ఆగస్టు 15న చెన్నైలోని ఫోర్ట్ సెయింట్ జార్జ్ వేదికగా తమిళనాడు ముఖ్యమంత్రి సి. జోసెఫ్ విజయ్ ఆధ్వర్యంలో అధికారికంగా స్వాతంత్ర్య దినోత్సవ వేడుకలు జరిగాయి. సీఎం హోదాలో విజయ్ జెండా ఎగురవేస్తున్న ఈ వేడుకలో అందరి కళ్ళు ఒకే ఒక్కరిపై పడ్డాయి. ఆవిడే స్టార్ హీరోయిన్ త్రిష కృష్ణన్. సాంప్రదాయ పసుపు రంగు చీరలో, తలలో మల్లెపూలు పెట్టుకుని త్రిష ఈ వేడుకకు ప్రత్యేక ఆకర్షణగా నిలిచింది. అయితే కేవలం ఆమె రాక మాత్రమే కాదు, అక్కడ వివిఐపి గ్యాలరీలో ఆమె కూర్చున్న ప్లేస్ ఇప్పుడు సోషల్ మీడియాలో పెను సంచలనంగా మారింది. సీఎం విజయ్ సొంత తల్లిదండ్రుల పక్కనే త్రిషకు ఫ్రంట్ రోలో సీటు కేటాయించడం వెనుక ఉన్న అసలు కథేంటి? గత కొన్ని నెలలుగా వీరిద్దరిపై వస్తున్న రూమర్స్ ఏంటి?
ఈ అధికారిక వేడుకలకు త్రిష తన తల్లి ఉమా కృష్ణన్తో కలిసి హాజరైంది. అక్కడ ఏర్పాటు చేసిన వివిఐపి వరుసలో విజయ్ తండ్రి ఎస్.ఎ. చంద్రశేఖర్, తల్లి శోభా చంద్రశేఖర్ ల పక్కనే త్రిషకు సీటు దక్కింది. సీఎం విజయ్ పరేడ్ నిర్వహిస్తూ వస్తున్నప్పుడు త్రిష ఎంతో గౌరవంగా నిలబడి ఆయనకు సెల్యూట్ చేయడం కెమెరాల్లో రికార్డై వైరల్ అవుతోంది. అయితే త్రిష ఇలా విజయ్ ఫ్యామిలీతో కలిసి కనిపించడం ఇదే మొదటిసారి కాదు. గత మే నెలలో జవహర్లాల్ నెహ్రూ స్టేడియంలో జరిగిన విజయ్ ముఖ్యమంత్రి ప్రమాణ స్వీకారోత్సవంలో కూడా త్రిష మొదటి వరుసలోనే కూర్చుంది.
ఆ సమయంలో విజయ్ తల్లి శోభను త్రిష ఎంతో ఆప్యాయంగా కౌగిలించుకున్న విజువల్స్ అప్పట్లో సంచలనం సృష్టించాయి. సినిమా వేడుకలకు భిన్నంగా పూర్తి అధికారిక మరియు రాజకీయ వేడుకల్లో విజయ్ కుటుంబ సభ్యులతో త్రిష ఇంతలా కలిసిపోవడం వెనుక ఉన్న ఆ బంధం ఏంటనే చర్చ కోలీవుడ్లో మొదలైంది. నిజానికి విజయ్, త్రిషల కలయికకు దాదాపు రెండు దశాబ్దాల సుదీర్ఘమైన చరిత్ర ఉంది. 2004లో వచ్చిన 'గిల్లి' సినిమాతో వీరిద్దరి కాంబినేషన్ మొదటిసారి వెండితెరపై మ్యాజిక్ చేసింది. మహేష్ బాబు 'ఒక్కడు' సినిమాకు రీమేక్గా వచ్చిన ఈ చిత్రం తమిళ ఇండస్ట్రీ రికార్డులను తిరగరాసింది. వీరిద్దరి ఆన్-స్క్రీన్ కెమిస్ట్రీకి ప్రేక్షకులు బ్రహ్మరథం పట్టారు.
ఆ తర్వాత వచ్చిన 'తిరుపాచ్చి', 'ఆది', 'కురువి' వంటి సినిమాలతో కోలీవుడ్లోనే మోస్ట్ సక్సెస్ఫుల్ పెయిర్గా నిలిచారు. ఆ తర్వాత దాదాపు 15 ఏళ్ల పాటు వీరిద్దరూ కలిసి సినిమా చేయలేదు. మళ్లీ లోకేష్ కనగరాజ్ దర్శకత్వంలో వచ్చిన 'లియో' సినిమాతో ఈ హిట్ జంట స్క్రీన్ను షేర్ చేసుకుంది. ఈ మధ్యే వచ్చిన 'ది గ్రేటెస్ట్ ఆఫ్ ఆల్ టైమ్' సినిమాలో కూడా త్రిష ఒక స్పెషల్ క్యామియో అప్పీరెన్స్ ఇచ్చి మెప్పించింది. ఈ 20 ఏళ్లలో వీరి మధ్య కేవలం వృత్తిపరమైన సంబంధమే కాకుండా ఒక బలమైన స్నేహం ఏర్పడింది.
వీరిద్దరి మధ్య ఉన్న ఈ సుదీర్ఘ స్నేహమే గత కొన్ని నెలలుగా సోషల్ మీడియాలో రకరకాల పుకార్లకు దారితీసింది. విజయ్ తన భార్య సంగీత సోర్ణలింగంతో విడాకుల ప్రక్రియలో ఉన్నారనే వార్తలు మరియు విడాకుల పిటిషన్ వివరాలు పబ్లిక్ డొమైన్లోకి వచ్చినప్పటి నుండి ఈ రూమర్స్ మరింత ఊపందుకున్నాయి. కల్పాతి ఫ్యామిలీ వెడ్డింగ్ రిసెప్షన్లో విజయ్, త్రిష ఇద్దరూ కలిసి మొదటిసారి బహిరంగంగా జంటగా హాజరైనప్పటి నుండి నెటిజన్లు వీరి వ్యక్తిగత బంధంపై చర్చలు మొదలుపెట్టారు. చార్మీ కౌర్ లాంటి సినీ ప్రముఖులు కూడా వీరిని 'గోల్డ్ కపుల్' అంటూ సంబోధించిన పాత పోస్టులు ఇప్పుడు మళ్లీ వైరల్ అవుతున్నాయి. అయితే ఈ రూమర్స్ ఎంత తీవ్రంగా వస్తున్నప్పటికీ, అటు విజయ్ కానీ, ఇటు త్రిష కానీ దీనిపై ఇప్పటివరకు ఎలాంటి అధికారిక స్పందన లేదా ప్రకటన చేయలేదు.
విజయ్ కేవలం సినిమాలకే పరిమితం కాకుండా రాజకీయాల్లోకి ప్రవేశించి, తన సొంత పార్టీని స్థాపించి, ప్రస్తుతం తమిళనాడు ముఖ్యమంత్రిగా బాధ్యతలు చేపట్టారు. విజయ్ తీసుకున్న ఈ చారిత్రాత్మక రాజకీయ నిర్ణయానికి మొదటి నుండి త్రిష తన పూర్తి మద్దతును ప్రకటిస్తూ వస్తోంది. విజయ్ జీవితంలో జరుగుతున్న ఈ పెద్ద మార్పుల్లో ఆమె ఒక శ్రేయోభిలాషిగా, కుటుంబానికి అత్యంత ఆప్తురాలిగా నిలిచింది. అందుకే విజయ్ కుటుంబం కూడా త్రిషను తమ ఇంంటి సభ్యురాలిలాగే చూసుకుంటుందని, స్వాతంత్ర్య దినోత్సవం లాంటి ఒక అత్యున్నత ప్రభుత్వ అధికారిక వేడుకలో తమ పక్కనే కూర్చోబెట్టుకోవడం ద్వారా ఆ విషయాన్ని స్పష్టం చేశారని విశ్లేషకులు భావిస్తున్నారు. ఏది ఏమైనప్పటికీ సినిమా ప్రపంచంలోనైనా, రాజకీయాల్లోనైనా విజయ్ సాధిస్తున్న విజయాల్లో త్రిష ఒక భాగస్వామిగా నిలుస్తూ తన స్నేహాన్ని చాటుకుంటోంది.
