మెగా కుటుంబంలో ఆనందం వెల్లివిరిసింది. మెగా పవర్ స్టార్ రామ్ చరణ్, ఉపాసన దంపతులు కవల పిల్లలకు ఒక పాప, ఒక బాబుకు జన్మనిచ్చారు. నిన్న రాత్రి అపోలో ఆసుపత్రిలో ఈ శుభఘడియ చోటు చేసుకోగా.. కొణిదెల, కామినేని ఇళ్లలో పండగ వాతావరణం నెలకొంది. ఈ వార్త తెలియగానే మెగా అభిమానులు సోషల్ మీడియాలో సంబరాలు మొదలుపెట్టారు. ఈ ఆనంద క్షణాలను అభిమానులతో పంచుకుంటూ రామ్ చరణ్ ఎమోషనల్ అయ్యారు. మాకు కవలలు పుట్టారని చెప్పడానికి చాలా సంతోషిస్తున్నాం. ఇప్పుడు ఇద్దరు కుమార్తెలు, ఒక కుమారుడితో మా కుటుంబం పరిపూర్ణమైంది, మాకు దక్కిన ఈ అదృష్టానికి ఎంతో కృతజ్ఞులం. మా జీవితంలోని స్త్రీలే మాకు కొండంత బలం.
ప్రతి క్షణం మా వెన్నంటి నిలిచిన అభిమానులకు, కుటుంబ సభ్యులకు ధన్యవాదాలు అని చరణ్ పేర్కొన్నారు. డెలివరీకి ముందు ఈ జంట తీయించుకున్న ఒక ఫోటోషూట్ ఇప్పుడు నెట్టింట ప్రత్యేక ఆకర్షణగా నిలిచింది. నలుపు రంగు దుస్తుల్లో ఎంతో హుందాగా, స్టైలిష్గా కనిపిస్తున్న ఈ ఫోటోలో చరణ్, ఉపాసనల మధ్య ఉన్న అనుబంధం స్పష్టంగా కనిపిస్తోంది. గర్భవతిగా ఉపాసన ముఖంలో మెరుపు, చరణ్ లోని నిశబ్ద ఆత్మవిశ్వాసం ఆ ఫోటోకు మరింత అందాన్ని తెచ్చాయి. ఈ ఫ్యామిలీ ఫోటోలో మరో క్యూట్ విశేషం ఏమిటంటే, వారిద్దరి పక్కన కూర్చున్న వారి పెంపుడు శునకాలు.
అవి ఆ ఫోటోకు ఒక స్పెషల్ అట్రాక్షన్ తెచ్చాయి. కేవలం ఒక ఫోటోలా కాకుండా, భవిష్యత్తు కోసం ఎదురుచూస్తున్న ఒక కుటుంబం ప్రేమానురాగాలకు ఇది అద్దం పడుతోంది. కవలల రాకతో మెగా ఇంట్లో సంతోషం రెట్టింపు అయ్యింది. స్టార్ కపుల్ జీవితంలో ఇది ఒక సరికొత్త అధ్యాయం అని చెప్పవచ్చు. ఈ వార్త తెలిసిన వెంటనే అభిమానులు, శ్రేయోభిలాషులు ఆసుపత్రి వద్దకు చేరుకుంటున్నారు. సోషల్ మీడియా వేదికగా సినీ ప్రముఖులు, ఫ్యాన్స్ ఈ దంపతులకు శుభాకాంక్షలు వెల్లువలా కురిపిస్తున్నారు.
