టాలీవుడ్ మాంత్రికుడు త్రివిక్రమ్ శ్రీనివాస్ మరియు విక్టరీ వెంకటేష్ కాంబినేషన్ అంటేనే ప్రేక్షకుల్లో ఒక ప్రత్యేకమైన క్రేజ్ ఉంటుంది. వీరిద్దరి కలయికలో రాబోతున్న లేటెస్ట్ మూవీ 'ఆదర్శ కుటుంబం'. ఎప్పుడో ప్రకటించిన ఈ ప్రాజెక్ట్ గురించి తాజాగా ఒక ఆసక్తికరమైన వార్త సోషల్ మీడియాలో సెన్సేషన్ క్రియేట్ చేస్తోంది. ముఖ్యంగా సినిమా మ్యూజిక్ డిపార్ట్మెంట్కు సంబంధించి వినిపిస్తున్న ఈ అప్డేట్ ఇప్పుడు హాట్ టాపిక్ గా మారింది. ఈ ప్రాజెక్ట్ ప్రారంభంలో సంగీత దర్శకుడిగా హర్షవర్ధన్ రామేశ్వర్ ను ఎంపిక చేసిన సంగతి తెలిసిందే. 'యానిమల్' సినిమాతో నేషనల్ వైడ్ గా తన మార్క్ చూపించిన హర్షవర్ధన్, ఈ సినిమాకు అద్భుతమైన మ్యూజిక్ ఇస్తాడని అందరూ ఆశించారు.
అయితే, అనూహ్యంగా ఆయన ఈ ప్రాజెక్ట్ నుండి తప్పుకున్నట్లు వార్తలు వస్తున్నాయి. ఆయన స్థానంలో టాలీవుడ్ సెన్సేషనల్ మ్యూజిక్ డైరెక్టర్ తమన్ ఎంట్రీ ఇచ్చినట్లు సమాచారం. దీనిపై ఇంకా చిత్ర యూనిట్ నుండి అధికారిక ప్రకటన రానప్పటికీ, ఫిలిం నగర్ వర్గాల్లో మాత్రం ఇది ఖాయమని వినిపిస్తోంది.తమన్ ఇలా ఆఖరి నిమిషంలో ప్రాజెక్టులోకి రావడం ఇదే మొదటిసారి కాదు. ఈ విషయంపై అభిమానులు సోషల్ మీడియాలో రకరకాల పోస్ట్లు పెడుతున్నారు. ముఖ్యంగా రీసెంట్ గా విడుదలైన 'ఉస్తాద్ భగత్ సింగ్' విషయంలో కూడా ఇలాగే జరిగింది. ఆ సినిమాలో పాటలకు దేవిశ్రీ ప్రసాద్ సంగీతం అందించగా, బ్యాక్ గ్రౌండ్ స్కోర్ బాధ్యతలను మాత్రం ఆఖరి నిమిషంలో తమన్ స్వీకరించారు.
ఇప్పుడు మళ్ళీ 'ఆదర్శ కుటుంబం' విషయంలో కూడా హర్షవర్ధన్ స్థానంలో తమన్ రావడం చూస్తుంటే, త్రివిక్రమ్ తన ఆస్థాన సంగీత దర్శకుడిపైనే మొగ్గు చూపినట్లు కనిపిస్తోంది. గతంలో వీరిద్దరి కాంబినేషన్లో వచ్చిన 'అల వైకుంఠపురములో', 'అరవింద సమేత', గుంటూరు కారం వంటి చిత్రాలు మ్యూజికల్ గా ఎంతటి విజయం సాధించాయో మనందరికీ తెలిసిందే. వెంకటేష్ కెరీర్ లో 'ఆదర్శ కుటుంబం' ఒక స్పెషల్ మూవీగా నిలవనుంది. పేరుకు తగ్గట్టుగానే ఇదొక పూర్తిస్థాయి ఫ్యామిలీ ఎంటర్టైనర్ అని తెలుస్తోంది. త్రివిక్రమ్ మార్క్ డైలాగులు, వెంకీ మామ కామెడీ టైమింగ్ తోడైతే బాక్సాఫీస్ వద్ద రికార్డులు తిరగరాయడం ఖాయంగా తోస్తోంది. హర్షవర్ధన్ రామేశ్వర్ తప్పుకోవడానికి గల కారణాలు ఇంకా తెలియాల్సి ఉంది. అయితే తమన్ రాకతో ఈ సినిమా మ్యూజిక్ పై అంచనాలు మరో స్థాయికి చేరుకున్నాయి. త్రివిక్రమ్-తమన్ కాంబో ఈసారి ఎలాంటి మ్యాజిక్ చేస్తుందో చూడాలి.
