ఆసియా పసిఫిక్ రీజియన్లో ఆర్టిఫిషియల్ ఇంటెలిజెన్స్ (AI) రంగాన్ని తదుపరి స్థాయికి తీసుకెళ్లేలా ఒక అద్భుతమైన గ్లోబల్ ప్రాజెక్ట్కు అడుగులు పడ్డాయి. ప్రముఖ ఏఐ నెట్వర్క్ ఇన్ఫ్రాస్ట్రక్చర్ ప్లాట్ఫారమ్ 'లైట్స్టార్మ్' (Lightstorm) సారథ్యంలో.. మైక్రోసాఫ్ట్, టాటా కమ్యూనికేషన్స్, మరియు సింగ్టెల్ కంపెనీలు కలిసి ఒక భారీ జాయింట్ బిల్డ్ అగ్రిమెంట్పై అధికారికంగా సంతకాలు చేశాయి. భారత్ మరియు ఆగ్నేయాసియా (India-Southeast Asia) దేశాలను అనుసంధానిస్తూ, కేవలం ఏఐ వర్క్లోడ్స్ మరియు డేటా బదిలీ కోసమే ప్రత్యేకంగా రూపొందించిన 'I-2SEA' సబ్మెరైన్ కేబుల్ సిస్టమ్ నిర్మాణాన్ని ఈ కూటమి ప్రకటించింది.
మచిలీపట్నం టు సింగపూర్.. హైదరాబాద్ ఐటి రంగానికి సరికొత్త బూస్ట్!
దాదాపు 3,600 కిలోమీటర్ల మేర సాగే ఈ ప్రతిష్టాత్మక సముద్ర గర్భ కేబుల్ వ్యవస్థ ద్వారా భారతదేశంలోని అత్యంత వేగంగా ఎదుగుతున్న ఏఐ హబ్లైన హైదరాబాద్, చెన్నై నగరాలను.. సింగపూర్, మలేషియా (కౌలాలంపూర్) లతో నేరుగా అనుసంధానించనున్నారు. ఈ ప్రాజెక్టులో భాగంగా భారతదేశంలో రెండు చోట్ల ల్యాండింగ్ స్టేషన్లను ఏర్పాటు చేస్తున్నారు. అందులో ఒకటి ఆంధ్రప్రదేశ్లోని మచిలీపట్నం కాగా, మరొకటి దక్షిణ చెన్నై. మచిలీపట్నం ల్యాండింగ్ పాయింట్ ద్వారా హైదరాబాద్లోని భారీ గిగావాట్ డేటా సెంటర్లకు అత్యంత వేగవంతమైన, లో-ల్యాటెన్సీ ఇంటర్నెట్ కనెక్టివిటీ లభించనుంది. దీనివల్ల దేశవ్యాప్తంగా ఉన్న 80కి పైగా డేటా సెంటర్లకు లైట్స్టార్మ్ నెట్వర్క్ ద్వారా అతుకులు లేని కనెక్టివిటీ లభిస్తుంది.
నిరంతర నిఘా.. 3 మీటర్ల లోతున గ్లోబల్ ఇంజనీరింగ్ అద్భుతం!
భారీ ఎంటర్ప్రైజెస్తో పాటు జీపీయూ (GPU) ఇన్ఫ్రాస్ట్రక్చర్ ప్రొవైడర్లు రన్ చేసే అత్యాధునిక ఏఐ మోడల్స్ శిక్షణకు ఈ కేబుల్ వ్యవస్థ వెన్నెముకగా మారనుంది. సముద్రంలో లంగర్లు వేయడం, నౌకల ప్రయాణాలు లేదా ప్రకృతి వైపరీత్యాల వల్ల కేబుల్కు ఎలాంటి నష్టం వాటిల్లకుండా ఉండటం కోసం ఒక ప్రత్యేక వ్యూహాన్ని అమలు చేస్తున్నారు. ఈ ప్రాజెక్ట్లో భాగంగా సముద్ర గర్భంలో ఏకంగా మూడు మీటర్ల లోతున (3-meter depth) ఈ కేబుల్ను పాతిపెట్టనున్నారు. దీనివల్ల నెట్వర్క్కు అత్యధిక రక్షణ లభించడమే కాకుండా, ఎక్కడా కనెక్టివిటీ కట్ అవ్వకుండా 100% ఆన్లైన్ బ్యాకప్ లభిస్తుంది. లైట్స్టార్మ్కు చెందిన 'Polarin' ప్లాట్ఫారమ్ ద్వారా కస్టమర్లు తమకు కావలసిన బ్యాండ్విడ్త్ను ఆన్-డిమాండ్ పద్ధతిలో స్కేల్ చేసుకునే వీలుంది.
2029 నాటికి పూర్తి.. అంతర్జాతీయ దిగ్గజాల పర్యవేక్షణలో పనులు!
ఈ అంతర్జాతీయ ప్రాజెక్టును 2029 చివరి త్రైమాసికం నాటికి పూర్తి చేసి, సేవలను ప్రారంభించాలని ఈ కూటమి లక్ష్యంగా పెట్టుకుంది. ఈ ప్రతిష్టాత్మక నిర్మాణ బాధ్యతలలో సిస్టమ్ సప్లయర్గా గ్లోబల్ లీడర్ 'NEC కార్పొరేషన్' వ్యవహరిస్తుండగా, సముద్రంలో కేబుల్ అమర్చే మెరైన్ ఇన్స్టాలేషన్ బాధ్యతలను 40 ఏళ్ల అనుభవం ఉన్న 'ఆసియాన్ కేబుల్షిప్' (ACPL) సంస్థకు అప్పగించారు. ఈ కేబుల్ సిస్టమ్కు సంబంధించిన కెపాసిటీ బుకింగ్స్ (Capacity Commitments) ఇప్పటికే ప్రారంభం కావడంతో గ్లోబల్ టెక్ మార్కెట్లో ఈ ప్రాజెక్టుపై భారీ అంచనాలు నెలకొన్నాయి.
No related posts found.
